काठमाडौं, २० असोज । एमालेले बहुमतीय प्रक्रियाबाट पार्टी अध्यक्ष केपी ओलीलाई प्रधानमन्त्री बनाउन समर्थन गर्ने दल र सभासद्को सूची तयार पारेको छ ।
एमालेको हिसाबमा अहिलेसम्म तीन सय १५ सांसदको समर्थन पुगेको छ । बहुमतबाट प्रधानमन्त्री निर्वाचित हुन दुई सय ९८ सांसदको मत आवश्यक पर्छ ।
एमाओवादी, राप्रपा नेपाल, राप्रपा, राष्ट्रिय जनमोर्चा र नेकपा मालेले समर्थन गर्ने बताएको ओलीनिकट स्रोतको दाबी छ ।
एमालेका एक सय ८३ सांसद छन् । ओलीलाई समर्थन गरेका एमाओवादी ८३, राप्रपा नेपाल २५, राप्रपा १२, नेपाल मजदुर किसान पार्टी चार, राष्ट्रिय जनमोर्चा तीन र मालेका पाँच सभासद् छन् ।
यसबाहेक अन्य केही साना दलको मत पाउनेमा ओली विश्वस्त रहेको नयाँ पत्रिका दैनिकले समाचार छापेको छ ।
कांग्रेस नेतृत्वमा सरकार बनाउँदा भएको सातबुँदे सहमति र २५ जेठमा १६ बुँदे सहमति गर्दा संविधान जारी भएपछि एमाले नेतृत्वमा नयाँ सरकार बनाउने गरी भद्र सहमति भएको, तर कांग्रेस पछाडि हटेको एमालेले जनाएको छ ।
एमाओवादी अध्यक्ष प्रचण्डले यसपटक प्रधानमन्त्रीका रूपमा एमाले अध्यक्ष ओलीलाई सघाउने बताउँदै आएका छन् ।
प्रचण्डले ओलीलाई प्रधानमन्त्री बनाउनेबारे भद्र सहमति भएको र त्यो सहमति तोड्ने नहुने पनि बताउँदै आएका छन् ।
प्रतिक्रिया