काठमाडौं, ८ कात्तिक । नेपाली कांग्रेसको केन्द्रीय कार्यालय सानेपा (पछिल्लो समय)मा लामो समय सेवा गरेका २ जनाको उपचारका लागि कांग्रेसले आर्थिक सहयोग उपलब्ध गराएको छ ।
कांग्रेसको स्थापनाकालदेखि झण्डै ४ दशकभन्दा बढी समय कांग्रेस कार्यालयमा काम गरेका ८३ वर्षीय मोहन केसी र ७० वर्षीय सुरेश श्रेष्ठ (कान्छा दाई) लाई उपचारका लागि जनही ५०–५० हजार रुपियाँ सहयोग गरिएको हो ।
केसीको रातोपुल र श्रेष्ठको बानेश्वरस्थित निवासमै पुगेर कांग्रेस केन्द्रीय सदस्य एवं सांसद धनराज गुरुङले ५०–५० हजार रुपियाँ नगद हस्तान्तरण गर्नुभएको थियो ।
नेपाली जनसम्पर्क समिति अमेरिकाले उनीहरूको उपचारका लागि जुटाएको रकम आफूले हस्तान्तरण गरेको केन्द्रीय सदस्य गुरुङले बताउनुभयो ।
‘नेपाली कांग्रेसका लागि दशकौँ खटिएका व्यक्तिको उपचारमा रकम अभाव हुनु दुःखद् हो । यद्यपि हामीले सबैलाई आग्रह गरेर जुटेको रकम उपलब्ध गराउँदै आएका छौँ’, गुरुङले भन्नुभयो ।
उहाँले उपचारका लागि थप रकम संकलन गर्ने अभियान जारी राखेको बताउनुभयो ।
दुवै जनालाई दमको समस्या रहेको छ । केसी विगत ३ वर्षदेखि अक्सिजनको भरमा बाँचिरहनु भएको छ ।
श्रेष्ठलाई पनि दम र कुपोषणको समस्या छ । उपचार सहयोग बुझ्दै दुवै जनाले कांग्रेसका दुःखीहरूलाई सहयोग गर्न पार्टीले नै संस्थागत पहल गरोस् भन्ने चाहना रहेको बताए ।
प्रतिक्रिया