मोदीसँग भेट गरेका कमल थापालाई मधेसी दल फकाउने जिम्मेवारी

काठमाडौं, २ कात्तिक । सरकारले आन्दोलनरत थारु र मधेसी केन्द्रित दलहरूसँग वार्ता गर्नका लागि चार सदस्यीय वार्ता टोली गठन गरेको छ ।

सिंहदरबारमा आज बसेको मन्त्रिपरिषद बैठकले उपप्रधान एवम् परराष्ट्रमन्त्री कमल थापाको संयोजकत्वमा चार सदस्यीय वार्ता टोली गठन गरेका उद्योगमन्त्री सोमनाथ पाण्डेले जानकारी दिनुभयो ।

वार्ता टोलीको सदस्यहरूमा कानुनमन्त्री अग्नि खरेल, सामान्य प्रशासन मन्त्री रेखा शर्मा र विनाविभागीय मन्त्री रामजनम चौधरी रहनुभएको छ ।

वार्ता टोलीले आन्दोलनरत थारु र मधेस केन्द्रित दलहरूसँग वार्ता गर्नेछ । वार्ता टोलीमा प्रमुख प्रतिपक्ष कांग्रेसलाई पनि सहभागी गराइने मन्त्री पाण्डेले बताउनुभयो । यद्यपि वार्ता टोलीमा बस्ने वा नबस्ने कांग्रेसले केही जनाएको छैन ।

भारत भ्रमणका क्रममा भारतीय प्रधानमन्त्री नरेन्द्र मोदी र भारतीय मन्त्रीहरूसँग भेट गरेका थापालाई सरकारले मधेसी दलहरूसँग वार्ता गरी निकास खोज्ने जिम्मेवारी दिएको छ ।

मन्त्रिपरिषद् बैठकले कारागार नियमावली संशोधन गरेको छ । सरकारले कैदीहरूको सजाय घटाउने गरी कारागार नियमावली संशोधन गरेको हो ।

संशोधित नियमावलीअनुसार अब ४० प्रतिशत कैद भुक्तान गरेका तथा ६५ वर्ष उमेर पुगेका कैदीलाई सरकारले कैद मिनाहा गर्ने बाटो खुलेको छ ।

यसअघि कैद मिनाहाका लागि ५० प्रतिशत कैद भुक्तान गरेको वा ७० वर्ष उमेर पूरा भएको हुनुपर्ने व्यवस्था थियो ।