काठमाडौं, ३० असोज । टेकुस्थित इपिडिमियोलोजी तथा सरुवा रोग नियन्त्रण महाशाखाले सर्पदंशका औषधि तराईका विभिन्न स्थानमा पठाएको छ ।
तराईका विभिन्न जिल्लामा औषधिको अभाव भएपछि सर्पदंशका साथै अन्य आवश्यक औषधिसमेत महाशाखाले शुक्रबार पठाएको हो ।
विशेषगरी तराई क्षेत्रमा यतिबेला सर्पको बिगबिगी हुने र त्यहाँका जनतालाई सर्पले डस्दा औषधिको अभावले धेरैले ज्यान गुमाउनुपर्ने अवस्था बढ्न थालेको र औषधिको अभाव देखिएपछि त्यसलाई न्यूनीकरण गर्न काठमाडौंबाट औषधि पठाउन परेको हो ।
महाशाखाका निर्देशक डा बाबुराम मरासिनीको नेतृत्वमा स्वास्थ्यकर्मीकोे एक टोली आज हेटौँडा गएको छ ।
हेटौँडाबाट त्यसआसपास क्षेत्रका आवश्यक जिल्लामा ती औषधि उपलब्ध गराइनेछ । हेटौँडा पठाइएका औषधिमा एनटी स्नेक भेनम, एन्टी रेविज भेक्सिन करिब १० लाखको छ ।
बुटवलमा पनि सोही मूल्य बराबरको औषधि पठाइएको निर्देशक मरासिनीले जानकारी दिनुभयो ।
त्यसैगरी कैलालीलगायतका स्थानमा इन्धनको अभावले तत्काल औषधि पठाउन नसकिएको बताउँदै गृह मन्त्रालाय र स्वास्थ्य मन्त्रालयसँग समन्वय गरी छिट्टै पठाइने तयारी भइरहेको महाशाखाले जनाएको छ ।
प्रतिक्रिया