भारतद्धारा नाका खोलेको नेपाललाई औपचारिक जानकारी, आजै रातिदेखि आपूर्ति गर्ने

काठमाडौं, १६ असोज । नेपालको संविधानमा असन्तुष्टि व्यक्त गर्दै अघोषित नाकाबन्दी गरेको भारतले शनिबारदेखि नाका खुलाएको छ ।

भारतले दुई सातादेखि लगाएको अघोषित नाकाबन्दी खोलेको कुरा नेपाल सरकारलाई औपचारिक रुपमा जानकारी समेत गराएको छ । शनिबार अपराह्न भारतीय विदेश मन्त्रालयले नेपालस्थित परराष्ट्र मन्त्रालयलाई नाकाबन्दी खुला गरेको जानकारी गराएको हो ।

परराष्ट्र मन्त्रालय स्रोतका अनुसार नेपालका ६ वटा मूख्य नाकासहितका भन्सारमा लगाइएको अघोषित नाकाबन्दी खोलिएको जानकारी भारतीय विदेश मन्त्रालयले गराएको हो । साथै उसले सुरक्षा व्यवस्था मजबुत भएका सबै नाकाबाट सहजरुपमा गाडी नेपाल भित्रन दिन मातहतका निकायलाई पनि निर्देश गरिसकेको जनाएको छ ।

भारतीय विदेश मन्त्रालयलाई उद्धत गर्दै परराष्ट्र मन्त्रालयका एक अधिकारीले सुरक्षा व्यवस्था सहज भएका नाकामा भारतले शनिबार राति देखिनै आपूर्ति सूचारु गर्ने र वीरगञ्जस्थित रक्सौलसहितका सुरक्षा जटिलता भएका नाकामा केही दिनपछि आपूर्ति व्यवस्था सहज हुने जानकारी दिनुभयो ।