काठमाडौं । नेपाली लोकसंगीत क्षेत्रकी चर्चित गायिका विष्णु माझीको नयाँ लोक दोहोरी गीत ‘फूल प्याउलीको’ सार्वजनिक भएको छ ।
गीतमा चर्चित गीतकार नवराज पन्तका मनछुने शब्द छ भने संगीत स्वयं गायक बसन्त थापाले भरेका हुन् ।
‘डाडै फुर्के सल्लो’, ‘सालको पातको टपरी’जस्ता लोकप्रिय गीतमा सहकार्य गरेका माझी, थापा र पन्तको केही समयको अन्तरालपछिको सहकार्यमा आएको यो गीत डान्सिङ शैलीमा समेत रहेको छ ।
मौलिक भाका र नेपाली जनजीवनको मिठास समेटिएको गीतमा माझीलाई स्वरमा थापाले साथ दिएका छन् ।
गीतलाई ‘एसएस सिरिज’ युट्युबमा सार्वजनिक गरिएको हो ।
नेपाली गाउँघरको संस्कृति, लाहुरे परिवेश, मौलिक जीवनशैली र मायाप्रेमको भावलाई गीतमा निकै सुन्दर ढंगले प्रस्तुत गरिएको छ ।
गीतमा विदेश र शहरदेखि दिक्क भएर आफ्नो गाउँठाउँ ठिकै हो, गाउँका फूल परिवेश राम्रा छन् भन्ने परिवेशको वर्णन गरिएको गीतमा माझीको जादुमय स्वर र थापाको ठेट गायकीको संगमले गीतलाई थप कर्णप्रिय बनाएको छ ।
गीतको भिडियो पनि बनेको छ ।
भिडियोमा डान्सर तथा मोडल प्रदीप लामा र जुना विश्वकर्माको अभिनय तथा नृत्य हेर्न सकिन्छ ।
भिडियोमा लाहुरे गाउँ फर्किएको परिवेश, मेलापात, घाँस–दाउरा, ढिकी–जाँतो, रोदी–झ्याउरे तथा नेपाली मौलिक जनजीवनलाई आकर्षक ढङ्गले समेटिएको छ । साथै, हिमशृङ्खला तथा रमणीय पहाडी भूगोलको पृष्ठभूमिमा खिचिएको दृश्यले दर्शकको आँखा लोभ्याउँछ ।
भिडियोको निर्देशन तथा कोरियोग्राफी मौसम हिमालीले गरेका हुन् ।
नवराज उप्रेतीले खिचेको भिडियोलाई मनोज कार्कीले सम्पादन गरेका छन् ।
गीतका निर्माता अर्जुन बोहरा हुन् । गीतले दर्शक स्रोताको मन जित्नेमा आफू ढुक्क रहेको गायक थापाले बताए ।
प्रतिक्रिया