काठमाडौँ, ६ भदौ । सभामुख सुवास नेम्वाङले सांसदहरूलाई संयमित भएर आफ्ना अभिव्यक्ति सदनसमक्ष प्रस्तुत गर्न आग्रह गर्नुभएको छ ।
व्यवस्थापिका–संसद्को आजको बैठकको प्रारम्भमा सभामुखसँग समय लिएर बोल्ने केही सांसदले उत्तेजित हुँदै अमर्यादित ढङ्गले विभिन्न दलका नेता तथा सांसदविरुद्ध नाम नै किटेर आक्षेप लगाएपछि सभामुख नेम्वाङले त्यस्तो आग्रह गर्नुभएको हो ।
थरुहट तराई पार्टी नेपालका गङ्गा चौधरी (सत्गौवा)ले नेपाली काँग्रेसका नेता शेरबहादुर देउवा र नेकपा एमालेका सांसद भीम रावलविरुद्ध आक्रोश पोखेपछि सभामुखले भन्नुभयो- “उत्तेजित हुनु हुँदैन, असंयमित हुँदा राम्रो सन्देश जाँदैन, सडकमा जारी असंयमता मत्थर पार्ने हामीले असन्तुलित मन्तव्य दिँदा हामी आफैंले बनाएको संसदीय नियमावली विपरीत हुन्छ ।”
साथै सभामुखले नेताद्वय देउवा र रावलको नाम व्यवस्थापिका- संसद्को ‘रेकर्ड’बाट मेटाउन संविधानसभा/व्यवस्थापिका-संसद् सचिवालयलाई निर्देशन दिनुभयो । रासस
प्रतिक्रिया