पाकिस्तानी एजेन्टलाई ओटीपी दिएको आरोपमा २ युवक पक्राउ

–सञ्जय मिश्रा

रौतहट । पाकिस्तानी एजेन्टलाई भारतीय मोबाइल नम्बरका ओटीपी उपलब्ध गराएको आरोपमा भारतको सीमावर्ती सहर रक्सौलबाट दुई युवक पक्राउ परेका छन् ।

आन्ध्र प्रदेशको विजयवाडा प्रहरी र रक्सौल प्रहरीको संयुक्त टोलीले उनीहरूलाई मंगलबार पक्राउ गरेको हो ।

प्रहरीका अनुसार, पक्राउ परेका युवकले ओटीपी उपलब्ध गराउन मोबाइल फोन, डेटा तथा अन्य स्रोतसाधन जुटाइदिएबापत रकम लिने गरेका थिए । उनीहरूको साथबाट दुई वटा मोबाइल फोन बरामद गरिएको छ ।

विजयवाडा प्रहरी काण्ड संख्या ०१/२०२६ को अनुसन्धानका क्रममा रक्सौलका व्यक्तिहरू पाकिस्तानी एजेन्टसँग जोडिएको सूचना पाएपछि संयुक्त कारबाही गरिएको प्रहरीले जनाएको छ ।

उक्त ओटीपी भारतविरोधी गतिविधि तथा कथित साइबर जासुसीमा प्रयोग भएको हुन सक्ने प्रहरीको आशंका छ । घटनामा अन्य व्यक्तिको संलग्नता, आर्थिक कारोबार र ओटीपीको प्रयोगबारे थप अनुसन्धान भइरहेको छ ।

सुरक्षा संवेदनशीलताको कारण देखाउँदै प्रहरीले पक्राउ परेका युवकको पहिचान सार्वजनिक गरेको छैन ।

उनीहरूमाथिका आरोप भने अनुसन्धान तथा न्यायिक प्रक्रियाबाट पुष्टि हुन बाँकी छन् ।