नुवाकोट र रसुवाका साना नदीमा आज आकस्मिक बाढीको उच्च जोखिम, सतर्कता अपनाउन आग्रह

काठमाडौं । वर्षासँगै देशका विभिन्न जिल्लामा आज (भदौ १५) आकस्मिक बाढीको जोखिम रहेको बाढी पूर्वानुमान महाशाखाले जनाएको छ । केही साना तथा ठूला नदीहरूमा पानीको बहाव उल्लेख्य बढ्ने सम्भावना रहेकाले जलतटीय क्षेत्रका बासिन्दालाई उच्च सतर्कता अपनाउन महाशाखाले आग्रह गरेको छ ।

विशेष गरी नुवाकोट र रसुवा भई बहने साना नदीहरूमा बहाव उल्लेख्य बढ्ने र आकस्मिक बाढीको उच्च सम्भावना रहेको पूर्वानुमान गरिएको छ । गत भदौ १० गते रसुवाको भोटेकोशीमा आएको विनाशकारी बाढीपछि हाल भोटेकोशी र त्रिशूली नदीको बहाव सतर्कता तहभन्दा तलै रहे पनि जोखिम कायमै रहेकाले उच्च सतर्कता आवश्यक रहेको महाशाखाले स्पष्ट पारेको छ ।

त्यस्तै, उपत्यकाका तीनै जिल्ला (काठमाडौं, ललितपुर, भक्तपुर)सहित ताप्लेजुङ, पाँचथर, तेह्रथुम, धनकुटा, संखुवासभा, सोलुखुम्बु, खोटाङ, ओखलढुंगा, रामेछाप, दोलखा, सिन्धुपाल्चोक, काभ्रेपलाञ्चोक, धादिङ, गोरखा, लमजुङ, तनहुँ, कास्की, मनाङ, मुस्ताङ, दार्चुला, बैतडी, डडेलधुरा, डोटी, अछाम, कैलाली र कञ्चनपुरका साना नदीहरूमा पनि बहाव बढ्ने र मध्यम जोखिम रहने जनाइएको छ ।

यसैबीच, सुनकोशी, नारायणी, त्रिशूली, बूढीगण्डकी, मर्स्याङ्दी, सेती, महाकाली र कन्काई लगायत ठूला नदीहरूमा पनि पानीको सतह उल्लेख्य बढ्ने अनुमान गरिएको छ । यद्यपि आज बिहानको मापनअनुसार देशका प्रमुख ठूला नदीहरू कोशी, नारायणी, बागमती, कर्णाली, महाकाली, कन्काई, कमला, बबई र राप्तीको बहाव हाल सतर्कता तहभन्दा तलै रहेको महाशाखाले जनाएको छ ।