काठमाडौं, २८ साउन । प्रधानमन्त्री सुशील कोइरालाले नेपालका लागि संघीयता नौलो भएकाले कठिनाइ भएको बताउनुभएको छ ।
संसदको आजको बैठकमा बोल्दै प्रधानमन्त्री कोइरालाले सबै मिलेर संघीयताको नौलो विषयलाई टुङ्गो लगानुपर्ने बताउनुभयो । उहाँले संघीयताको विषयलाई अन्यथा नलिन आग्रह गर्नुभयो ।
सुर्खेत, जुम्लासहितका जिल्लामा विभिन्न माग राखेर आन्दोलन भइरहेको बताउनुभएका प्रधानमन्त्री कोइरालाले सबैका हकअधिकार स्थापिन हुन थालेका बेला आन्दोलन आवश्यक नरहेको बताउनुभयो ।
उहाँले आफ्ना अधिकारलाई संस्थागत गर्नका लागि लाग्नुपर्ने बताउनुभयो ।
उहाँले विश्वास गरेर अधिकारका लागि सम्वादमा लाग्न आग्रह गर्नुभयो ।
मधेशका साथीहरूलाई संघीयताप्रति अविश्वास नगर्न आग्रह गर्नुभएका प्रधानमन्त्री कोइरालाले भन्नुभयो, ‘मधेशका साथीहरूलाई संघीयता आउँछ भने विश्वास नै थिएन ।’
कोइरालाले मुलुकमा सहमतिका साथ संविधान ल्याउने तयारीमा लागेको भन्दै सम्वाद र सहमतिलाई पनि निरन्तरता दिइरहेको बताउनुभयो ।
उहाँले भन्नुभयो, ‘मुलुक धेरै ठूलो परिवर्तनमा जाँदैछ । प्रवेश गरिसकेको छ । नयाँ संविधान जनताले निर्माण गरिरहेका छन् ।’
प्रधानमन्त्री कोइरालाले आन्दोलनकारीहरूलाई आफ्ना आन्दोलनका कार्यक्रम फिर्ता लिन आग्रह गर्नुभयो ।
उहाँले संविधान जारी हुने अन्तिम चरणमा रहेको भन्दै आन्दोलन आवश्यक नरहेको बताउनुभयो ।
उहाँले आन्दोलन अराजक बन्दै गएपछि सरकार चुप लागेर नबस्ने बताउनुभयो ।
प्रधानमन्त्री कोइरालाले हिंसा बढेपछि सुरक्षा निकायले आफ्नो काम गर्ने बताउनुभयो ।
प्रतिक्रिया