गिरिजा कोइरालाको स्मृति दिवसमा रवीन्द्र मिश्रको विवादास्पद टिप्पणी

६ चैत्र २०८१, बिहिबार ४ : २० बजे

910

फन्ट परिवर्तन गर्नुहोस:

काठमाडौं, ७ चैत । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रले नेपाली कांग्रेसका पूर्वसभापति तथा पूर्वप्रधानमन्त्री स्वर्गीय गिरिजाप्रसाद कोइरालाको १५औँ स्मृति दिवसमा कोइरालाबारे विवादास्पद टिप्पणी गरेका छन् ।

बिहीबार फेसबुकमा लेख्दै मिश्रले आफ्नो टिप्पणीमा गिरिजाप्रसाद कोइरालाको राजनीतिक कार्यकाल र निर्णयहरूप्रति गम्भीर आपत्ति जनाउँदै सात बुँदामा उनको आलोचना गरेका हुन् ।

आफ्नो टिप्पणीमा मिश्रले कोइरालालाई कांग्रेसको ‘वीपीपथ’को उचाइलाई ‘जीपीपथ’मा झारेर ‘प्रचण्डपथ’मा विलय गराउने नेता भने । उनले थप आरोप लगाउँदै कोइरालाले ‘राजासँगको चरम असन्तुष्टि र रीसको आवेगमा देशको दीर्घकालीन हित मैँ घात’ गरेको आरोप लगाएका छन् ।

मिश्रका अनुसार कोइरालाले माओवादी विद्रोह चलिरहेको समयमा संसदमा ‘सांसद किनबेच, धमिजा/लाउडा काण्ड’ जस्ता घोटालाहरूमा ध्यान दिएको र ‘प्रशासन, न्यायलय, स्कूल र विश्वविद्यालयदेखि, समाजको हरेक पत्रलाई दलीयकरण गरेर समाजलाई सदाका लागि पतित’ बनाएको आरोप लगाएका छन् ।

यसका साथै, मिश्रले कोइरालाको आलोचना गर्दै ‘सङ्क्रमणको राम्रो योजना नै नबनाइ निजीकरणको नाममा अमूल्य राष्ट्रिय उद्योगहरू ध्वस्त पार्ने नेता’को संज्ञा दिएका छन् ।

मिश्रले फेसबुकमा लेखेका छन्–

आज उहाँको स्मृति दिवस रहेछ!

उहाँलाई म यसरी सम्झिन्छु

१। काँग्रेसको ‘वीपीपथ’को उचाइलाई ‘जीपीपथ’ मा झारेर ‘प्रचण्डपथ’ मा विलय गराउने नेता।

२। राजासँगको चरम असन्तुष्टि र रीसको आवेगमा देशको दीर्घकालीन हित मैँ घात गर्ने नेता।

३। राजासँगको रीसको सुरमा देशको पहिलो राष्ट्रपति बनाउने ‘प्रचण्ड ललिपप’मा फसेका नेता।

४। नारायणहिटी दरबार भत्काएर त्यसको ठाउँमा विदेशी दरबार निर्माण गर्ने नेता।

५। बहूदलीय प्रजातन्त्रको जगलाई काण्डैकाण्ड, षडयन्त्रै षडयन्त्र, नातावाद/कृपावाद, असक्षमता, कूशासन र भ्रष्टाचारले ध्वस्त बनाइदिने नेता।

६। गाउँमा माओवादी आगो सल्किँदै गर्दा संसदमा सांसद किनबेच, धमिजा/लाउडा काण्ड गर्ने, प्रशासनदेखि, न्यायलयदेखि, स्कूल र विश्वविद्यालयदेखि, समाजको हरेक पत्रलाई दलीयकरण गरेर समाजलाई सदाका लागि पतित बनाउने ‘एकजना प्रमुख’ नेता।

७। सरकारी उद्योगहरूलाई संसारका अन्य देशमा पनि बेलाबखत निजीकरण गरिन्छ। तर तिनलाई निजीकरण गर्दा ती सधैँ ध्वस्त/बन्द हुँदैनन्। तर सङ्क्रमणको राम्रो योजना नै नबनाइ निजीकरणको नाममा अमूल्य राष्ट्रिय उद्योगहरू ध्वस्त पार्ने नेता।

सर्रर्र दिमागमा आएको यही हो। छुटेका बुँदा सूचिकृत गर्न अनुरोध गर्दछु।