रौतहट, ७ असोज । रौतहटको राजपुर नगरपालिकाको दुई वडामा फैलिएको झाडापखाला हैजा पुष्टि भएको छ । हैजा पुष्टि भएसँगै अन्य समुदायमा फैलिन नदिन जिल्ला प्रशासन कार्यालय रौतहटले वडा नम्बर ४ लाई निषेधित क्षेत्र घोषणा गरेको छ ।
जिल्ला प्रशासन कार्यालय रौतहटले आइतबार एक सूचना जारी गर्दै राजापुर नगरपालिका ४ स्थित जोवैर चौकदेखि मदनी चौक, शेख अब्दुल्लाहको खलिहानदेखि डाक्टर नुरुल होदाको घरसम्मको वरिपरी क्षेत्रलाई निषेधित क्षेत्र घोषणा गरेको हो । यस क्षेत्रमा स्वास्थ कार्यालय प्रमुखको अनुमतिबिना स्वास्थ्यकर्मी, सुरक्षाकर्मी, सफाईकर्मी, अत्यावश्यक काम बाहेक कुनै व्यक्ती हिँडडुल गर्न नपाउने सिडिओ हिरालाल रेग्मीद्वारा जारी सूचनामा उल्लेख गरिएको छ ।
त्यस्तै, एक अर्काको घर वा बस्तीमा आवतजावत नियन्त्रण गर्ने, अत्यावश्यक बाहेक सवारीसाधन जान नपाइने, माछा मासु ओसारपसार, बिक्री वितरण गर्न नपाउने, स्थानीय स्वास्थ्य शाखाबाट जारी आदेश पूर्ण पालना गर्ने गराउने सूचनामा उल्लेख गरिएको छ ।
राजपुर नगरपालिकाको पत्रअनुसार वडा ४ मा गत २ गते १ जनामा झाडा पखाला देखिएको त्यसपछि क्रमसः बढ्दै गएको तथा आरडिटी र कल्चरको रिपोर्ट पोजिटिभ आउँदा रोकथाम नियन्त्रण तथा अन्य समुदायमा फैलिन नदिन प्रभावित क्षेत्रमा मानिसको आवतजावतलगायतका गतिविधि तत्काल रोक्न सहयोगको लागि अनुरोध गरिएको थियो । नगरपालिकाको आग्रहसँगै सुरक्षा निकायका प्रमुखसहित डाक्टरको टोलीले हैजा प्रभावित क्षेत्रमा अनुगमन निरीक्षण गरेपछि दुई वडा निषेधित क्षेत्र घषणा गरिएको सिडिओ रेग्मीले जानकारी दिनुभएको छ ।
सिडिओ रेग्मी, नेपाल प्रहरीका एसपी दिलीप घिमिरे, सशस्त्र प्रहरीका एसपी बिक्रम हुमागाईं, राष्ट्रिय अनुसन्धानका एसपी अभिनयकुमार सिंहसहित सुरक्षा अधिकारीको टोलीले हैजा प्रभावित क्षेत्र राजापुर ३ र ४ को स्थलगत अनुगमन गरेको थियो । त्यसअघि प्रादेशिक अस्पताल गौरको मेडिकल सुपरिन्डेन्ट डाक्टर मुरारी ठाकुरको नेतृत्वमा शनिबार आवश्यक औषधिसहित पुगेको थियो ।
राजापुरको दुई वडामा झाडा पखालाको बिरामीको संख्या बढ्दै गएकाले प्रादेशिक अस्पताल गौरका अध्यक्ष महमद अनवर हाशमी, डाक्टर मुरारी ठाकुर, इमर्जेंसी इनचार्ज डाक्टर राजेशकुमार सिंह, डाक्टर गोपाल गुप्तालगायतको टिम आवश्यक औषधिहरु लिएर प्रभावित क्षेत्रमा पुगेको थियो ।
राजपुर ३ र ४ मा झाडापखालाको प्रकोप फैलिएको छ । बिहीबार र शुक्रबार २२ जना झाडा पखालाका बिरामी उपचार गराउन प्राथमिक स्वास्थ्य केन्द्र राजपुरमा गएका थिए । त्यसमध्ये ७ जना बिरामीको दिसाको सेम्पल टेष्टको लागि प्रादेशिक अस्पताल गौरमा आरडिटी प्रविधिबाट र जनकपुर अस्पतालमा कल्चर गर्दा हैजाको जीवाणु फेला परेको डाक्टर ठाकुरले जानकारी दिनुभएको छ ।
२२ जना बिरामी मध्ये प्राथमिक स्वास्थ्य केन्द्र राजपुरमा महिला १०, बालबालिका ७ र एक जना पुरुष गरी अहिले १८ जना भर्ना गरेर उपचार भइरहेको छ । त्यहाँ बिरामीको लागि बेडलगायत विभिन्न बन्दोबस्तीका सामान सशस्त्र प्रहरीको टोलीले उपलब्ध गराएको राजापुरको नगर स्वास्थ्य संयोजक खुर्शैद आलमले बताउनुभएको छ ।
प्रतिक्रिया