पूर्वमुख्यमन्त्री कार्कीले तोडे अनसन

विराटनगर, २७ भदौ । कोशी प्रदेशका पूर्वमुख्यमन्त्री केदार कार्कीले अनसन तोड्नुभएको छ ।

सरकारले उहाँको माग सम्बोधन गर्ने प्रतिबद्धता जनाएपछि विराटनगर–६ निवासी निर्मला शर्माकी ४२ दिने शिशुको हातबाट जुस खाएर कार्कीले राति अनसन तोड्नुभएको हो ।

कार्कीले उठाएका माग पूरा गर्ने विषयमा कार्की र आन्तरिक मामिला तथा कानुन मन्त्री लीलावल्लभ अधिकारीबीच सहमति भएको थियो । वार्ताका लागि मन्त्री अधिकारी अनसन स्थल पुग्नुभएको थियो ।

आफ्नो सरकारले ल्याएका जनप्रिय कार्यक्रमहरु कटौती भएको भन्दै कार्कीले मंगलबारबाट कोशी प्रदेश सभा नजिकै देवकोटा चोकमा आमरण अनसन शुरु गर्नुभएको थियो ।

कार्कीले आफ्नो कार्यकालमा घोषणा भएका १० वर्षमुनिका बालबालिकालाई निःशुल्क उपचार घोषणा, शैलजा आचार्य हृदयरोग अस्पताल सञ्चालन, हात्तीसहित सबै जंगली जनावरको संरक्षणका लागि जनावरमैत्री जंगल अभियान, महिला स्वयंसेविकालाई प्रोत्साहन कार्यक्रम, विराटनगरमा केसलिया करिडोर निर्माणलगायतका कार्यक्रम वर्तमान सरकारले कटौती गरेको आरोप लगाउँदै अनसन सुरु गर्नुभएको थियो।