एमालेले बहुमत नल्याएसम्म देश बन्दैन : विष्णु पौडेल

सर्लाही, ३० बैशाख । नेकपा (एमाले) का उपाध्यक्ष विष्णु पौडेलले एमालेले बहुमत नल्याएसम्म देश नबन्ने बताउनुभएको छ ।

आज सर्लाहीको मलङ्गवामा पार्टीको नवौँ जिल्ला अधिवेशन उद्घाटन समारोहलाई सम्बोधन गर्नुहुँदै उपाध्यक्ष पौडेलले देश बनाउन मधेसका नागरिकको उत्थान हुनुपर्ने बताउनुभएको हो ।

देशको विकासमा एमालेले जति अन्य पार्टीले योगदान नगरेको उहाँको भनाइ छ । राष्ट्रिय गौरवको योजनाका रुपमा महत्वपूर्ण योजना अगाडि एमालेले मात्रै सार्ने र यो पूरा गर्ने अभिभारा एमालेको भएको स्पष्ट पार्नुभयो ।

८४ को निर्वाचनमा पार्टीलाई बहुमत दिलाउन नेता कार्यकर्तालाई उहाँले आह्वान गर्नुभयो । कार्यक्रममा एमाले नेता तथा रक्षामन्त्री हरिप्रसाद उप्रेतीले मधेसका समस्या समाधानमा सरकार दत्तचित्त रहेको बताउनुभयो।

मधेसका जनताको ठूलो समस्याको रुपमा रहेको कृषि, सिँचाइ, मिटरब्याजलगायत समस्यामा एमाले संवेदनशील रहेको उप्रेतीको भनाइ थियो।