हेटौंडामा दुई छोरालाई विष खुवाइ आमाद्वारा आत्महत्याको प्रयास, १८ महिने छोराको मृत्यु

हेटौंडा, १८ जेठ । मकवानपुरको हेटौंडा उपमहानगर-१५ नम्बर वडा जाँतेमा बस्ने एक आमाले आफ्नै दुई नाबालक छोराहरुलाई विष खुवाएर आत्महत्याको प्रयास गरेकी छिन् ।

हिजो बुधबार साँझ स्थानीय बाबुराम वाईवाको श्रीमती ३६ वर्षीया सोनी पाख्रिनले आफ्नै छोरा ७ वर्षीय अस्किन वाईवा र १८ महिने छोरा जेनिस वाईवासहित प्यारा क्वाईट डाइक्लोराईड नामक झार मार्ने विषादी सेवन गरेकी थिइन् ।

जसका कारण नाबालक छोरा जेनिसको आज बिहान उपचारको क्रममा पुरानो मेडिकल कलेज भरतपुर, चितवनमा मृत्यु भएको जिल्ला प्रहरी कार्यालय मकवानपुरका प्रहरी प्रवक्ता डिएसपी टेकबहादुर कार्कीले जानकारी दिए ।

उनका अनुसार विषादी सेवनबाट गम्भीर बिरामी भएका उनीहरुलाई उपचारको लागि हेटौंडा अस्पताल ल्याइएको थियो ।

यहाँ उपचार सम्भव नहुने देखिएपछि गएराति नै उनीहरुलाई चितवन पठाइएको थियो । अहिले सोनी र उनका ७ वर्षीय छोरा अस्किनको पुरानो मेडिकल कलेज भरतपुरमा उपचार भइरहेको छ ।

प्रहरीका अनुसार सोनीको अवस्था गम्भीर रहेको छ । विष सेवन गर्नुको कारण नखुलेको र यस विषयमा आफूहरुले अनुसन्धान गरिरहेको डएसपी कार्कीको भनाइ छ ।