पाँच दिनकी सुत्केरीले समेत खान पाइनन्

काठमाडौं, ५ जेठ । सोमबार दिउँसो टुँडिखेल पुग्दा ५ दिनकी सुत्केरी सुजाता बस्नेत कतिबेला खाना खान पाइएला भनेर कुरिरहेकी थिइन् ।

बिहानदेखि बिस्कुट र चाउचाउको भरमा रहेकी उनी २ बजेतिर कुनै संस्थाले दिने भात कुरिरहेकी थिइन् ।

उनले पर्याप्त खाना खान नपाएर बच्चालाई पुग्ने गरी दुध आइरहेको छैन ।

दोलखा चरिकोटकी उनी १२ गतेको भुइचालोपछि पालमा बसिरहेकै बेला उनलाई सुत्केरी बेथा लागेको थियो रे ।

बच्चा जन्माउनका लागि गत मंगलबार बिहान थापाथलीस्थित प्रसुती गृहमा भर्ना भएकी उनलाई भुइचालोपछि अस्पतालले फर्काइदिएको कान्तिपुर दैनिकले छापेको छ ।

‘भुइचालोको धक्काको त्रासमा दुई दिन बेथाले छटपटाउँदै पालमै बसें’, उनले भनिन्, ‘बिहिबार मात्र अस्पताल पुगेपछि बच्चा जन्मियो ।’

‘दुख कष्ट सहेर बच्चा त जन्मियो अहिले न त कपडा छ न खाना नै’, उनले भनिन्, ‘एउटा संस्थाले एक सरो कपडा र दिनको एक पटक खाना दिनुभाछ । अरु कसैले केही दिएको छैन ।’