काठमाडौं, २३ माघ । काठमाडौं जिल्ला अदालतले ब्युटी पेजेन्टका सञ्चालक मनोज पाण्डेलाई ७ वर्षको जेल सजाय तोकेको छ ।
न्यायाधीश दीपक ढकालको इजलासले पाण्डेलाई सात वर्ष कैद सजाय र पीडितलाई ७५ हजार क्षतिपूर्ति भराउने फैसला सुनाएको हो ।
काठमाडौं जिल्ला अदालतले गत माघ १० गते नै पाण्डेलाई बाल यौन दुरुपयोग र मानव बेचबिखनको मुद्दामा दोषी ठहर गरेको थियो । माघ १० गते भएको फैसला अनुसार बाल यौन दुरुपयोगमै त्यतिबेला नै ६ महिना कैद सजाय र ५० हजार रुपैयाँ क्षतिपूर्ति भराउने फैसला सुनाइएको थियो ।
मानव बेचबिखनको कसुरमा भने ३ वर्षभन्दा बढी कैद सजाय हुने भएकाले सजाय निर्धारणका लागि माघ २३ गतेको पेसी तोकिएको थियो ।
२०७० सालमा एक किशोरीलाई बाल यौन दुरुपयोग तथा विभिन्न स्थानमा लगी शारीरिक शोषण गरेको अभियोगमा सरकारले पाण्डेविरुद्ध मानव बेचबिखन र बाल यौन दुरुपयोगको मुद्दा दायर गरेको थियो ।
मिस ग्लोबल इन्टरनेसनलमा भाग लिएकी १६ वर्षीया किशोरीलाई बलात्कार गरेको भन्दै पाण्डेविरुद्व जाहेरी परेको थियो ।
प्रहरीले जेठ ७ गते स्वयम्भुबाट पाण्डेलाई पक्राउ गरेको थियो।
प्रतिक्रिया