झापा, २० माघ । नेकपा (एमाले) का अध्यक्ष एवम् पूर्व प्रधानमन्त्री केपी शर्मा ओलीले नागरिकलाई व्यावहारिक र प्राविधिक शिक्षा प्रदान गरी दक्ष जनशक्ति उत्पादन गर्नु आवश्यक रहेको बताएका छन् ।
शुक्रबार गृहनगर झापाको दमकमा दमक बहुप्राविधिक शिक्षालयको शैक्षिक भवन शिलान्यास गर्दै अध्यक्ष ओलीले उक्त धारणा व्यक्त गरेका हुन् ।
उनले आफू पहिलो पटक प्रधानमन्त्री हुँदै गर्दा नै नेपालमा ७० प्रतिशत जनशक्ति प्राविधिक शिक्षाबाट उत्पादन गर्ने अभियान अगाडि बढाएको जानकारी दिए ।
सोही अभियान अन्तर्गत अहिले सीटीईभीटीले देशैभरि आफ्ना कार्यक्रम अघि बढाएको र ३० प्रतिशत शिक्षामात्र अप्राविधिक रहने ओलीले बताए । प्राविधिक शिक्षाले दक्ष जनशक्ति उत्पादन गर्ने र रोजगार, स्वरोजगार सृजना हुने उनको भनाइ छ ।
झापामा बहुप्राविधिक शिक्षा अध्ययनको अवसर सृजनापछि यस क्षेत्रमा रोजगारी सृजनामा सहज बनाउने विश्वास गरिएको छ । सबैलाई स्थानीय ठाउँमा नै दक्ष योग्य बनाउने आफ्नो योजना रहेको अध्यक्ष ओलीले बताए । यस्ता प्राविधिक शिक्षालय अन्य क्षेत्रमा समेत विस्तार गरेर लैजान आवश्यक रहेको उनको भनाइ छ ।
‘जीवन, पेशा, व्यवसायसँग व्यावहारिक रूपमा नजोडिएको शिक्षाले बेरोजगारमात्र उत्पादन हुन्छ तसर्थ अबको शिक्षा अन्तर्राष्ट्रिय स्तरसँग जोडिएको हुनुपर्छ,’ अध्यक्ष ओलीले भने ।
प्रतिक्रिया