जुवातास खेलिरहेका १६ जना काठमाडौंको बाफल र गोंगबुबाट पक्राउ

काठमाडौं, २८ असोज । छुट्टाछुट्टै स्थानमा जुवातास खेलिरहेका १६ जनालाई प्रहरीले काठमाडौंको बाफल र गोंगबुबाट पक्राउ गरेको छ ।

प्रहरीले काठमाडौं महानगरपालिका–१३ बाफलस्थित वीरगञ्ज खाजा घरभित्र जुवातास खेलिहेको अवस्थामा खाजा घर सञ्चालक गोरखाको गोरखा नगरपालिका–१४ घर भएका २२ वर्षीय सन्दिप अधिकारीसहित पाँच जनालाई बिहीबार साँझ प्रहरीले पक्राउ गरेको छ ।

प्रहरी वृत्त कालीमाटीबाट खटिएको प्रहरीले उनीहरूलाई तास खेलिरहेको अवस्थामा नगद २९ हजार ६७० रूपैयाँ र ३ बुक ताससहित फेला पारी पक्राउ गरेको बताएको छ ।

यसैगरी काठमाडौं महानगरपालिका–२६ गोगंबुस्थित वीरेन्द्र ऐश्वर्य मार्ग नजिक रहेको होटल ब्ल्याक स्टोनमा जुवातास खेलिरहेको अवस्थामा होटेल सञ्चालक मकवानपुर घर भएका ४२ वर्षीय कृष्णबहादुर लामासहित ११ जनालाई बिहीबार दिउँसो प्रहरीले पक्राउ गरेको छ ।

जिल्ला प्रहरी परिसर काठमाडौं, प्रहरी वृत्त महाराजगञ्ज र प्रहरी प्रभाग बलम्बुबाट खटिएको संयुक्त प्रहरी टोलीले उक्त होटलको कोठा नम्बर ५०१ मा जुवातास खेलिरहेका उनीहरूलाई नगद ४ लाख २५ हजार रूपैयाँ र २१ बुक तास सहित फेला पारी पक्राउ गरेको हो ।

घटना सम्बन्धमा प्रहरीले आवश्यक अनुसन्धान गरिरहेको बताएको छ ।