लड्डु खुवाएर पाँच लाख लुट्ने सार्वजनिक

काठमाडौँ। चोरीको अभियोगमा पक्राउ परेका सोलुखुम्बु तिङ्लाकाका दीपक भुजेललाई चोरिएका सामान र नगदसहित महानगरीय प्रहरी अपराध महाशाखाले सार्वजनिक गरेको छ ।

सवारी चालकको काम गर्दैआएका अभियुक्त भुजेलले गएको बिहीबार भारतीय नागरिक सदाव हमाम खानलाई लुटपाट गरेका थिए । बा८च ६२७९ नम्बरको गाडीमा राखेर पाटन ढोका पु¥याएपछि उनको व्यागमा रहेका महत्वपूर्ण कागजात, ल्यापटप, मोबाइलसमेत गरी करिब पाँच लाख मूल्यबराबरको सामान लिएर फरार भएको प्रहरी उपरीक्षक भूपाल भण्डारी जानकारी दिनुभयो ।

फरार अभियुक्तले प्रयोगमा ल्याएका सवारी साधन भक्तपुरको कौशलटारमा छाडेको थियो । चोरी गरी लगेको सामानसहित भुजेललाई प्रहरीले शनिबार पक्राउ गरेको हो । उसबाट प्रहरीले चोरी गरी लगेका सबै सामानसमेत बरामद गरेको जनाएको छ ।

त्यसैगरी, नशालु पदार्थ खुवाएर लुटपाट गर्ने दुईजना अभियुक्तलाई दसीका सामानसहित पक्राउ गरेर सार्वजनिक गरिएको छ ।

बागलुङ पैयुथनथापका ढुण्डीराज शर्मा र नुवाकोट तालुका गाविस–५ का ज्ञानेश्वर दाहाललाई लुटपाटको अभियोगमा पक्राउ गरिएको हो ।

उनीहरुले दोलखा झुले गाविस घर भई हाल शान्तिनगर बस्ने टोपबहादुर काफ्लेलाई बुटवलमा सस्तो जग्गा खरिद गर्ने भनी नशालु पदार्थ मिसाइएको लड्डु खुवाई पाँच लाख ५४ हजार लुटेका थिए ।

अभियुक्तहरुबाट प्रहरीले नगद एक लाख र तीनवटा मोबाइल बरामद गरेको छ । दुवै घटनाका सम्बन्धमा प्रहरीले थप अनुसन्धान जारी राखेको छ ।