नबिल बैंकको नामबाट ‘ठगी धन्दा’ हुनेबारे बैंकद्वारा सजग हुन आग्रह

काठमाडौँ, ३० जेठ । नबिल बैंकको नाममा नक्कली फेसबुक एकाउन्ट बनाएर गलत सूचना सम्प्रेषण भएको पाइएको छ ।

नबिल बैंकले नै एक सूचनामार्फत त्यसबारे सचेत हुन आग्रह गरेपछि यसबारे खुलेको हो ।

बैंकले आम ग्राहक र जनसमुदायलाई सचेत गराएको हो । फेक अकाउन्टबाट नगद उपहार परेको जस्ता भ्रामक सूचना प्रवाह भएको पाइएको भन्दै बैंकले भ्रममा नपर्न आग्रह गरेको छ ।

नक्कली अकाउन्टबाट प्रेषित भ्रामक सूचना ठगीको नियतका साथ सम्प्रेषण भएको हुनसक्ने भन्दै बैंकले सचेत गराएको हो ।

बैंकको फेसबुकबाट भेरिफाइड भएको फेसबुक पेज मात्रै रहेको र त्यसबाट पोस्ट गरिएका सूचना तथा जानकारी मात्रै आधिकारिक भएको सूचनामा उल्लेख गरिएको छ ।