कुन जिल्लामा छन् ५ सय बढी कोरोना संक्रमित ?

काठमाडौँ, १३ वैशाख । नेपालमा पछिल्लो २४ घण्टामा थप ३ हजार ५५६ जनामा कोरोनाभाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयले पीसीआर र एन्टिजेन परीक्षणबाट गत २४ घण्टामा थप ३ हजार ५५६ जनामा कोरोना पुष्टि भएको जनाएको छ ।

१२ हजार ४ सय जनाको पीसीआर र ८९३ जनाको एन्टिजेन परीक्षण भएको मन्त्रालयले जनाएको छ ।

यससँगै कुल संक्रमितको संख्या ३ लाख ३ सय ५६१ जना पुगेको मन्त्रालयले जनाएको छ ।

पछिल्लो २४ घण्टामा थप ३७८ जना कोरोनामुक्त भएका छन् । योसहित निको हुनेको संख्या २ लाख ७७ हजार ९ सय ५१ जना पुगेको छ ।देशभर सक्रिय संक्रमितको संख्या २२ हजार ४ सय ३४ जना रहेको छ ।

त्यस्तै, एकै दिनमा काठमाडौँमा मात्रै १५ सय ६७ जनामा कोरोना संक्रमण पुष्टि भएको छ । त्यस्तै ललितपुरमा २२३ र भक्तपुरमा १२२ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

त्यसैगरी, नेपालमा हाल काठमाडौँ उपत्यकाका तीन जिल्लासहित, मोरङ, पर्सा, कास्की, दाङ, बाँके र रुपन्देहीमा ५ सयभन्दा बढी सक्रिय संक्रमित रहेका छन् ।

हालसम्म मृत्यु हुनेको संख्या ३ हजार १ सय ७६ जना पुगेको मन्त्रालयले जनाएको छ ।