काठमाडौँ उपत्यकामा थपिए १३ सय ५७ कोरोना संक्रमित

काठमाडौँ, १५ कात्तिक । काठमाडौँ उपत्यकामा थप १ हजार ३ सय ५७ जनामा कोरोनाभाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयले पछिल्लो २४ घण्टामा उपत्यकामा १ हजार ३ सय ५७ जनामा संक्रमण पुष्टि भएको जानकारी दिएको छ ।

संक्रमितमध्ये ५ सय ६९ जना महिला र ७ सय ८८ जना पुरुष रहेका छन् ।

हाल काठमाडौँमा १६ हजार ८ सय ९० जना सक्रिय संक्रमित रहेका छन् । त्यस्तै, भक्तपुरमा १ हजार १ सय ५१ सक्रिय संक्रमित रहेका छन् भने ललितपुरमा २ हजार ३ सय ३ जना रहेका मन्त्रालयले जनाएको छ ।

देशभर शनिबार थप २ हजार ५ सय ८ जनामा संक्रमण पुष्टि भएको मन्त्रालयले जनाएको छ । हालसम्म कोरोनाका कारण ९ सय ३७ जनाको मृत्यु भइसकेको छ ।