कोरोना जित्नको संख्या एक लाख नाघ्यो, बिहीबार ३२ सय बढी निको

काठमाडौँ, ६ कात्तिक । नेपालमा गत २४ घण्टामा थप ३ हजार २ सय १५ जनाले कोरोना जितेका छन् ।

बिहीबार नियमित प्रेस ब्रिफिङमा स्वास्थ्य तथा जनसंख्या मन्त्रालयको प्रवक्ता प्रा. डा. जागेश्वर गौतमले पछिल्लो २४ घण्टामा थप ३ हजार २ सय १५ जना संक्रमणमुक्त भएको जानकारी दिए ।

योसहित निको हुनेको संख्या १ लाख २ हजार ८ सय २० पुगेको छ ।

त्यस्तै, बिहीबार थप ३ हजार ६ सय ३७ जनामा कोरोना पुष्टि भएसँगै संक्रमितको संख्या १ लाख ४८ हजार ५ सय ९ पुगेको छ ।

हाल देशभर ४४ हजार ८ सय ७७ जना सक्रिय संक्रमित रहेका छन् । पछिल्लो २४ घण्टामा थप २१ जनाको कोरोना संक्रमितको मृत्यु भएको छ ।

यससँगै मृतकको संख्या ८ सय १२ जना पुगेको छ ।