संरक्षित वन्यजन्तु सालकको खपटासहित तीन जना पक्राउ

काठमाडौँ, २९ असोज । भक्तपुर नगरपालिका ९ च्याम्हासिंहबाट ५ किलो ३ सय ग्राम संरक्षित वन्यजन्तु सालकको खपटासहित ३ जनालाई मंगलबार प्रहरीले पक्राउ गरेको छ ।

पक्राउ पर्नेहरुमा रामेछाप दोरम्वा गाउँपालिका ५ वस्ने ४५ वर्षीय लाल तामाङ, काठमाडौँ गौशला बस्ने सिन्धुली कमलामाई नगरपालिका ९ घर भएका २३ वर्षीय कपिल बस्नेत र भक्तपुर, भक्तपुर नगरपालिका ९ बस्ने रामेछाप सुनापति गाउँपालिका ४ घर भएका ३० वर्षीय ज्ञान बहादुर तामाङ रहेका छन् ।

प्रहरी प्रधान कार्यालय केन्द्रीय अनुसन्धान व्यूरो महाराजगंजबाट खटिएको प्रहरीले उनीहरुलाई उक्त सालकको खपटा अवैध रुपमा ओसार पसार तथा बेचबिखन गर्न लागेको अवस्थामा फेला पारी पक्राउ गरेको हो ।

उनीहरुलाई आवश्यक कारबाहीका लागि डिभिजन वन कार्यालय भक्तपुरमा पठाइएको उक्त व्यूरोले जनाएको छ ।