बुटवल, १९ असोज । सर्वदलीय बैठकमा प्रदेश राजधानीबारे कुनै सहमति जुट्न नसकेपछि बैठकबाट बाहिरिएको नेपाली कांग्रेसको संसदीय दलको बैठक शुरु भएको छ ।
बिहान ९ बजे संसदीय दलको बैठक बोलाइएको भए पनि सर्वदलीय बैठक बस्न र केन्द्रको निर्देशन आउन ढिला गरेकाले बैठक भर्खर मात्र शुरु भएको कांग्रेसकी सचेतक निर्मला क्षेत्रीले बताइन् ।
बैठकमा सहमतिविना प्रदेशसभा चले कांग्रेस कसरी प्रस्तुत हुने भन्नेबारेमा छलफल भइरहेको उनले बताइन् । प्रदेशसभाले भने दिउँसो १२ बजे प्रदेशसभा बैठक बोलाएको छ । जसमा सरकारले लगेको प्रस्तावमाथि छलफल गर्ने कार्यसूची छ ।
तर, कांग्रेसले यसअघिको सर्वदलीय बैठकमै प्रदेशसभा बैठक रोकेर छलफल गर्नुपर्ने र सहमतिमै राजधानी निर्धारण गर्नुपर्ने अडान राखेको छ ।
नेकपाकै कतिपय सांसदहरु विभाजित भएको अवस्थामा राजधानी प्रस्तावबारे विरोध जनाउन कांग्रेसलाई थप बल पुग्दै गएको छ ।
प्रतिक्रिया