बुटवल, १९ असोज । प्रदेश ५ को राजधानी दाङको भालुवाङमा बनाउने प्रस्तावबारे छलफल गर्न बसेको प्रदेशसभाको सर्वदलीय बैठक निष्कर्षविहीन बनेको छ ।
केही बेरअघि शुरु भएको उक्त बैठक निष्कर्षविहीन बनेपछि १० मिनटमै सकिएको छ । बैठक शुरु हुनासाथ नेपाली कांग्रेसले केही दिन प्रदेशसभा स्थगित गरेर राजधानीबारे छलफल गर्ने र सहमति जुटाउने प्रस्ताव गरेको थियो ।
तर, नेकपाले प्रदेशसभा स्थगित गर्न नमानेपछि कांग्रेस बैठकबाट बाहिरिएको छ । बिहान ८ बजे बोलाएको बैठक सवा १० बजे शुरु भए पनि त्यसले कुनै निष्कर्ष निकाल्न सकेन ।
कांग्रेसले जस्तै जनता समाजवादी पार्टी नेपालले पनि केही दिन प्रदेशसभा स्थगित गर्न आग्रह गरेको छ । संसदीय दलका प्रमुख सहसराम यादवले जनता सडकमा उत्रिएका बेला एकलौटी ढंगबाट राजधानी तोक्न नहुने बताएका छन् ।
नेकपा प्रमुख सचेतक भूमिश्वर ढकालले भने पहिलो बैठक बिनानिष्कर्ष टुंगिए पनि पुनः बैठक बस्ने तयारी गरेको बताए । सहमतिको प्रयास जारी रहेकाले प्रदेशसभा बैठक स्थगित नहुने उनको भनाइ छ ।
प्रतिक्रिया