भारतीय सञ्चारमाध्यम नसच्चिएसम्म बन्द गर्न अनुरोध

काठमाडौँ, २८ असार । सञ्चार तथा सूचना प्रविधिमन्त्री डा युवराज खतिवडाले भारतीय सञ्चारमाध्यमहरुले इमानदारिता नदेखाएसम्म नेपालमा बन्द गर्न अनुरोध गरेका छन् ।

मन्त्री खतिवडाले राष्ट्रिय तथा अन्तर्राष्ट्रिय सञ्चारमाध्यमले नैतिक दायराभित्र बस्नुपर्ने बताउँदै केवल सञ्चालकहरुलाई त्यस्तो अनुरोध गरेका हुन् ।

उनले भने, ’सेवा प्रदायकले राष्ट्र, राष्ट्रियता र समाजप्रतिको दायित्व बोध गरेर सेवा प्रतिबन्ध गर्नुभएको छ, उनीहरूले पेशाप्रतिको इमानदारिता प्रदर्शन गरेर नआएसम्म यो कायमै राखिदिन अनुरोध गर्दछु ।’

मन्त्री खतिवडाले भारतीय सञ्चारमाध्यमले राष्ट्रियता, स्वाभिमान र राजनेताको मानमर्दन र दूरासयपूर्ण विषयवस्तु बाहिर ल्याएकोमा सरकारले विज्ञप्तिमार्फत ध्यानाकर्षण भएको जानकारी गराएको उल्लेख गरे ।

’कोभिडसँगै अहिले प्राकृतिक विपदसँग लडिरहेका छौँ, अर्कोतर्फ हामीले राजनीतिक नक्सा अध्यावधिक पनि गरेका छौँ,’ उनले भने, ’सबै नेपालीको एकता यहाँ प्रदर्शित भएको छ, यो एकताबाट कोही तर्सिएको हुन सक्छ ।’