काठमाडौँ, ५ असार । सत्तारूढ नेपाल कम्युनिष्ट पार्टी र चिनियाँ कम्युनिष्ट पार्टीबीच शुक्रबार २ घण्टासम्म भिडिओ कन्फ्रेन्स भएको छ ।
कन्फ्रेन्समा नेकपा नेताहरू पार्टी कार्यालय धुम्बाराहीबाट सहभागी भएका थिए ।
कन्फ्रेन्समा चीन सम्बन्ध, दुई कम्युनिष्ट पार्टीबीचको सम्बन्ध र समसामयिक विषयमा छलफल भएको नेताहरूले बताएका छन् ।
कन्फ्रेन्सको सुरू कम्युनिष्टहरूको अन्तर्राष्ट्रिय गीत बजाएर गरिएको थियो ।
चीनका तर्फबाट चिनियाँ कम्युनिष्ट पार्टीका अन्तर्राष्ट्रिय विभाग प्रमख सुन ताओ र तिब्बत कमिटीका सचिव यु याङजे सहभागी भएका थिए ।
चिनियाँ सहभागीहरुले नेपालले एक चीन नीतिप्रति साथ रहेकोमा प्रशंसा गरेको बताइएको छ ।
छलफलमा हिमालय क्षेत्रको अन्तरदेशीय सम्पर्क सञ्जाल बनाउन दुबै देश मिलेर काम गर्नु पर्ने धारणा आएको थियो । त्यस्तै, दुवै देशले संयुक्त रूपमा सगरमाथाको नयाँ उचाइ पनि सार्वजनिक गर्ने बताइएको छ ।
भिडिओ कन्फ्रेन्समा नेकपाका अध्यक्ष प्रचण्डले नेपाल र चीनसँगको सम्बन्ध र कम्युनिष्ट पार्टीबीच सम्बन्धबारे चर्चा गरेका थिए ।
उपप्रधानमन्त्री ईश्वर पोखरेलले कोरोनाभाइरसविरूद्ध नेपालले गरिरहेका कामबारे चर्चा गरेका थिए ।
समयमै लकडाउन गरिएकाले संक्रमणलाई कम गर्न सकिएको उनको भनाइ थियो ।
प्रतिक्रिया