थप १८७ जनाले जिते कोरोना, निको हुनेको संख्या ८३१ पुग्यो

काठमाडौँ, २९ जेठ । नेपालमा बिहीबार थप १ सय ८७ जना कोरोनामुक्त भएका छन् ।

निको हुनेमा ८ महिला र १ सय ७९ पुरुष रहेका छन् । यससँगै निको हुनेको संख्या ८ सय ६१ पुगेको स्वास्थ्य तथा जनसंख्या मन्त्रालयको नियमित मिडिया ब्रिफिङमा प्रवक्ता डा जागेश्वर गौतमले जानकारी दिए ।

त्यस्तै, थप २ सय ५० जना कोरोना संक्रमित थपिएसँगै संक्रमितको संख्या ४ हजार ६ सय २२ जना पुगेको छ ।

मन्त्रालयका अनुसार बिहीबारसम्म नेपालमा आरडीटी विधिबाट १ लाख ७५ हजार १४३ नमुना परीक्षण भएका छन् । पीसीआर विधिबाट भने हालसम्म १ लाख १५ हजार ९३० परीक्षणहरु गरिएका छन् । हालसम्म क्वारेन्टाइनमा रहनेको संख्या १ लाख ६२ हजार १३ जना रहेका छन् ।

त्यसैगरी आइसोलेसनमा रहनेको संख्या ३ हजार ७३८ जना रहेका छन् ।

हालसम्म कोरोनाका कारण नेपालमा १५ जनाको मृत्यु भइसकेको छ ।