काठमाडौँमा ४ र भक्तपुरमा १ गरी उपत्यकामा थपिए ५ जना कोरोना संक्रमित

काठमाडौँ, २४ जेठ । उपत्यकामा थप ५ जनामा कोरोनाभाइरस संक्रमण देखिएको छ ।

स्वास्थ्य तथा जनसंख्या मन्त्रालयका प्रवक्ता डा. विकास देवकोटाले शनिबार नियमित पत्रकार सम्मलेनमा भक्तपुर कमलविनायककी ३१ वर्षीया महिला र काठमाडौँ महानगरका ४ जनामा संक्रमित थपिएका जानकारी दिएका हुन् ।

काठमाडौँका संक्रमितमा ३१ र ३५ वर्षीया महिला र ३६ र ४६ वर्षीय पुरूषमा संक्रमण देखिएको हो ।

नेपालमा शनिबार एकै दिनमा ३ सय २३ जनामा कोरोना संक्रमण पुष्टि भएको छ । यससँगै संक्रमितको संख्या ३ हजार २ सय ३५ जना पुगेको छ ।

त्यस्तै, ३ सय ६५ जना संक्रमित निको भएर डिस्चार्ज भएका छन् भने शनिबार थप २ जनासहित १३ जनाको मृत्यु भएको छ ।