काठमाडाैं, २५ माघ । काठमाडौंमा जारी विश्वकप क्रिकेट लिग दुई अन्तर्गतको त्रिकोणात्मक एक दिवसीय क्रिकेट श्रृंखलामा नेपाल र अमेरिका बीचको खेल जारी छ ।
कीर्तिपुरको टीयू क्रिकेट मैदानमा जारी खेलमा नेपालले टस हारेर पहिले ब्याटिङ गरिरहेको छ ।
आजको खेलमा ओपनर सुवास खकुरेलले अवशर पाएका छन् । ओमानसँगको खेलमा सर्वाधिक ५५ रन बनाएका शरद भेषवाकर चोटका कारण खेल्न नसक्ने भएपछि खकुरेललाई मैदानमा उतारिएको हो ।
नेपाललाई आजको खेल जित्नै पर्ने दबाव परेको छ । यसअघि पहिलो खेलमा नेपालले ओमानसंग १८ रनको हार बेहोरेको थियो ।
अमेरिका पनि पहिलो खेलमा ओमानसंग ६ विकेटले पराजित भएको थियो ।
विश्वकप क्रिकेट लिग दुई लाई सन् २०२३ मा हुने एक दिवसीय विश्वकप क्रिकेटको छनोटको रुपमा समेत हेरिएको छ ।
सात टोली सहभागी यो प्रतियोगिताका शीर्ष दुई स्थानमा अमेरिका र ओमान रहेका छन् । एउटा खेल मात्रै खेलेको नेपालले अंक जोड्न सकेको छैन ।
अहिलेसम्म ९ खेलबाट अमेरिका र ८ खेलबाट ओमानको समान १२ अंक छ ।
८ खेलबाट ९ अंक जोडेको स्कटल्यान्ड तेस्रो, ७ खेलबाट ८ अंक जोडेको नामिबिया चौथो स्थानमा छ ।
पाँचौ स्थानको युएईले ७ खेलबाट ७ अंक जोडेको छ । पहिलो खेल हारेको नेपाल छैटौं तथा ८ खेल खेलेर अंकविहीन पपुवा न्यूगिनी पुछारमा छ ।
प्रतिक्रिया