बबरमहलमा बसले मोटरसाइकललाई ठक्कर दिँदा एकको ज्यान गयो, एक घाइते

काठमाडौं, ६ फागुन । राजधानीको बबरमहलमा बुधबार मध्याह्न बसले मोटरसाइकललाई ठक्कर दिँदा एक युवकको ज्यान गएको छ । मोटरसाइकल चालकको अवस्था पनि गम्भीर छ ।

मृत्यु हुनेमा सुनसरी जिल्ला, धरान नगरपालिकाका करिब २८ वर्षीय प्रवीण प्रधान रहेको प्रहरीले जनाएको छ । माइतीघरबाट नयाँबानेश्वरतर्फ गइरहेको बा २८ प २९४८ नं मोटरसाइकलको पछाडि बसेका प्रधानको उपचारका लागि न्युरो अस्पताल अनामनगरमा पुर्‍याउने क्रममा मृत्यु भएको हो ।

नयाँबानेश्वरबाट माइतीघरतर्फ आउँदै गरेको बा १ प ११६६ नं को पर्यटक बस र मोटरसाइकल आपसमा ठोक्किएको हो । दुर्घटनामा गम्भीर घाइते मोटरसाइकल चालक धादिङ नौबिसे गाविस–३ का चालक राजीव अधिकारीको पनि सोही अस्पतालमा उपचार भइरहेको छ ।