नयाँदिल्ली, ५ फागुन । भारतीय प्रधानमन्त्री नरेन्द्र मोदीले कुनैपनि धार्मिक सम्प्रदायमाथिको आक्रमण क्षम्य नहुँने भन्दै त्यसका विरोधीमाथिको कारबाहीका लागि सबैको सहयोगको अपेक्षा गर्नुभएको छ ।
उहाँले नयाँ दिल्लीमा मङ्गलबार आयोजित एक कार्यक्रममा भन्नुभयो– कुनैपनि धार्मिक सम्प्रदायमाथिको आक्रमण सरकारलाई सह्य हुँदैन, त्यस्तालाई सरकारले कडाभन्दा कडा कारबाही गर्नेछ ।
यस्ता आक्रमणबाट देशका अल्पसङ्ख्यकमाथि त्रास फैलाउने र जातीय दङ्ग मच्चाउने कार्य नगर्न सबै क्षेत्र र समुदायका नागरिकलाई उहाँले आग्रह पनि गर्नुभयो ।
म कुनैपनि धर्मप्रतिको हिंसाको निन्दा गर्छु– उहाँले भन्नुभयो । हालैका केही दिनयता भारतका विभिन्न स्थानमा रहेका चर्चमाथि आक्रमण गरिएको घटनाको विरुद्धमा उहाँको यो अभिव्यक्ति आएको हो ।
नयाँ दिल्लीमा क्रिश्चियन् चर्च समूहले आयोजना गरेको कार्यक्रममा उहाँले सो धारणा राख्नुभएको हो ।
भारतमा रहेका कुनैपनि अल्पसङ्ख्यक हुन् वा बहुसङ्ख्यक हुन उनीहरुको धार्मिक आश्थाका साथै सम्मानमा चोट पुग्ने कुनैपनि कार्यलाई मेरो सरकारले राम्रो मान्दैन– उहाँले भन्नुभयो ।
भारतीय प्रधानमन्त्री नरेन्द्र मोदीको राजनीतिक दल भारतीय जनता पार्टी हिन्दू धर्मवादी पार्टी हो । रासस
प्रतिक्रिया