इलाम, ५ फागुन । नेपाली काँग्रेसका वरिष्ठ नेता तथा पूर्व प्रधानमन्त्री शेरबहादुर देउवाले एमाओवादीले आन्दोलनलाई विद्रोहमा परिणत गरेर संविधान बनाउन दिन्न भन्दैमा प्रक्रिया नरोकिने बताउनुभएको छ ।
उहाँले संविधान निर्माणको प्रक्रिया अगाडी बढीसकेकाले कुनै हालतमा पनि नरोकिने जिकिर गर्नुभयो । संविधान निर्माणका लागि सुरु भएको बहुमतीय प्रक्रिया नरोकिने उहाँको भनाई छ । आन्दोलनरत दलसँग वार्ता र संविधान निर्माणको प्रक्रिया सँगसँगै अघि बढ्ने उहाँले बताउनुभयो ।
नेपाली काँग्रेस जिल्ला कार्य समिति इलामले मंगलबार इलाममा आयोजना गरेको कार्यकर्ता भेटघाटको अवसरमा बोल्दै देउवाले वार्ता र प्रक्रियासँगै अघि बढ्ने बताउनुभएको हो । वार्ता सँगसँगै प्रक्रिया पनि अघि बढ्छ, उहाँले भन्नुभयो, “नेपाली काँग्रेस सहमतिमै संविधान बनोस् भन्ने चाहन्छ ।”
प्रश्नावली समिति खारेज नहुने पनि उहाँको भनाइ छ । एमाओवादीले भनेजस्तो प्रश्नावली समिति खारेज हुँदैन, सहमतिका लागि केही दिन संविधानसभा स्थगन मात्र भएको हो उहाँले भन्नुभयो । एनेकपा माओवादी नेतृत्वको ३० दलीय मोर्चाले घुर्की लगाइरहेको आरोप पनि उहाँले लगाउनुभयो ।
देउवाले प्रधानमन्त्री सुशील कोइरालाले ३० दलीय मोर्चालाई वार्तामा बोलाइसकेको भन्दै मोर्चालाई वार्तामा आउनसमेत आग्रह गर्नुभयो । वार्तामा नआए अब धेरै दिन पर्खेर बस्न नसकिने उहाँले बताउनुभयो ।
आफ्नै पार्टीको नेतृत्वमा नयाँ संविधान जारी हुने उहाँले कार्यकर्तालाई बताउनुभयो । अहिलेकै सरकारले संविधान बनाउँछ, उहाँले भन्नुभयो । देउवाले संविधान निर्माणका लागि आफ्नो पार्टी हदैसम्म लचिलो हुन तयार रहेको बताउँदै मोर्चालाई वार्तामा बोलाउँदा समेत वार्तामा नआउनु दुःखको कुरा हो, भन्नुभयो ।
प्रतिक्रिया