काठमाडौँ, २१ फागुन । भारत सरकार स्वामित्वको एयर इन्डियाले आफ्ना चालक दलका सदस्यहरुलाई ‘जय हिन्द’ भन्न निर्देशनात्मक आदेश जारी गरेको छ । उसले उडानका क्रममा हुने हरेक अनाउन्समेन्टपछि ‘जय हिन्द’ भन्न निर्देशनात्मक आदेश जारी गरेको हो ।
यसअघि सन् २०१६ मा पनि एयर इन्डियाका अध्यक्ष आश्वानी लोहानीले ‘जय हिन्द’ भन्न निर्देशन दिएका थिए । देशको मुडअनुसार त्यसलाई फेरि कडाइका साथ पालना गर्न एयर इन्डियाले आफ्ना चालक दलका सदस्यलाई भनेको हो ।
समयमा नउड्ने, यात्रुमाथि उचित व्यवहार नहुनेलगायतका गुनासा आएपछि लोहानीले यात्रुहरूमा राम्रो प्रभाव पार्न जहाज टेक अफ हुनुभन्दा पहिला ‘जय हिन्द’ भन्न निर्देशन दिएका थिए ।
फेब्रुअरी १४ को पुलवामा आक्रमणपछि भारतीय प्रधानमन्त्री नरेन्द्र मोदीको राष्ट्रवादी अभियानलाई साथ दिन एयर इन्डियाले आदेश जारी गरेको बताइन्छ ।
प्रधानमन्त्री मोदीले सार्वजनिक सञ्चारमाध्यम र आममानिसले पाकिस्तानविरोधी राष्ट्रवादलाई बढावा दिइरहेका छन् । पाकिस्तानमा भारतीय वायु सेनाले बम खसालेको दिन प्रधानमन्त्री मोदीले ‘यो देशलाई म मेटिनँ दिन्न’ भन्दै भाषण गरेका थिए ।
अहिले भारतीय पुरूषमा पाकिस्तानले रिहा गरिदिएका वायु सेनाका चालक अभिनन्दन वर्तमानको जस्तो जुँगाको काट्ने लहर चलेको छ ।
प्रतिक्रिया