काठमाडौँ, २१ असोज । सशस्त्र प्रहरी बल कमाण्ड तथा स्टाफ कलेज सानोगौचरण काठमाडौंमा चौंथो समूहको ‘एपीएफ कमाण्ड तथा स्टाफ कोर्ष’ संचालन भएको छ ।
सशस्त्र प्रहरी महानिरीक्षक शैलेन्द्र खनालले आइतबार सशस्त्र प्रहरी बल नेपाल प्रधान कार्यालय हल्चोक स्वयम्भुमा आयोजित कार्यक्रममा चाैथाे समूहको ‘एपीएफ कमाण्ड तथा स्टाफ कोर्षको उद्घाटन गरे ।
सशस्त्र प्रहरी महानिरीक्षक खनालले गहन अध्ययन र परिश्रमबाट कोर्षको प्रवेश परीक्षामा उत्तीर्ण भई छनोट भएकोमा परीक्षार्थी अधिकृतहरुले गर्व गर्नुपर्ने बताउँदै मेहनतका साथ कोर्ष सम्पन्न गर्नुपर्ने बताए ।
एपीएफ अधिकृतहरुको व्यावसायिक क्षमता र योग्यतामा अभिवृद्वि गरि भविष्यमा संगठनको नेतृत्व गर्नसक्ने सक्षम अधिकृत उत्पादन गर्ने उद्देश्यले स्टाफ कलेज स्थापना भएको स्मरण गर्दै सशस्त्र प्रहरी महानिरीक्षक खनालले एपीएफ कमाण्ड तथा स्टाफ कलेज आफ्नो उद्देश्य प्राप्तीको दिशामा प्रभावकारी ढंगले अगाडी बढिरहेको उल्लेख गरे ।
उनले कोर्षबाट नेतृत्व विकास, व्यावसायिक कार्यकूशलता, फौजको परिचालन लगायतका विविध प्रकृतीका क्षमतामा अभिवृद्धि हुने विश्वास व्यक्त गर्दै भविष्यमा आउन सक्ने सुरक्षा चुनौतीको सामना गर्न एपीएफ कमाण्ड तथा स्टाफ कोर्षको महत्वपूर्ण भूमिका रहने विश्वास व्यक्त गरे ।
सशस्त्र प्रहरी महानिरीक्षक खनालले कोर्ष संचालनको लागि नेपाल सरकार गृहमन्त्रालय र त्रिभुवन विश्वविद्यालयबाट प्राप्त सहयोग तथा सहकार्य प्रति आभार प्रकट गरे । त्रिभुवन विश्वविद्यालय (मानबिकि तथा समाजशास्त्र)का डिन शिवलाल भुसालले यस्ता कोर्षले एपीएफ अधिकृतको ज्ञान र क्षमतामा अभिवृद्धि हुने चर्चा गर्दै कोर्ष उपयोगी रहेको उल्लेख गरे ।
उनले सशस्त्र प्रहरी बल नेपालले आफ्नो कार्यक्षेत्र भित्रका विविध कामकारवाहीमा सफलता प्राप्त गरिरहेको बताउदै संगठनले आफ्नो दायित्व निर्वाहमा उत्कृष्ट कार्य गरिरहेको चर्चा गरे । यस कोर्ष संचालनमा त्रिभुवन विश्वविद्यालयबाट सहयोग भईरहेको स्मरण गर्दै उनले आगामी दिनहरुमा समेत आवश्यक सहयोग र समन्वय भइरहने बताए ।
सशस्त्र प्रहरी बल कमाण्ड तथा स्टाफ कलेजका शैक्षिक संयोजक अवकाश प्राप्त सशस्त्र प्रहरी अतिरिक्त महानिरीक्षक रविराज थापाले कोर्षले एपीएफ अधिकृतको नेतृत्व विकासमा महत्वपूर्ण सघाउ पुर्याउने चर्चा गर्दै संगठनको लागि कोर्ष फलदायी रहेको बताए ।
ज्ञान, सिप तथा व्यावसायिक क्षमता अभिवृद्धिमा यस कोर्षले महत्वपूर्ण योगदान पुर्याउने उल्लेख गर्दै उनले कोर्षको समाप्तीपछि प्रशिक्षार्थीहरुले अझै बढि योगदान पुर्याउन सफल हुने विश्वास व्यक्त गरे । कार्यक्रममा सशस्त्र प्रहरी बरिष्ठ उपरीक्षक ई. किशोर प्रधानले स्वागत मन्तव्य व्यक्त गरेका थिए ।
सशस्त्र प्रहरी बल कमाण्ड तथा स्टाफ कोर्षमा राष्ट्रिय तथा अन्तर्राष्ट्रिय सुरक्षा चुनौती तथा सुरक्षा रणनीति, द्वन्द्व व्यवस्थापन, संयुक्त राष्ट्रसंघीय पद्वती, नेतृत्व र विकास, सीमा, भन्सार तथा औद्योगिक सुरक्षा, विशिष्ट व्यक्ति तथा महत्वपूर्ण प्रतिष्ठानको सुरक्षा, विपद व्यवस्थापन लगायत सुरक्षा, विकास र शान्ति लगायतका विषयहरु समेटिएको कुरा समारोहमा चर्चा गरिएको थियो ।
१८ महिना अवधिको कोर्षमा कूल १२ जना सशस्त्र प्रहरी नायव उपरीक्षकहरु सहभागी रहेका छन् ।
प्रतिक्रिया