काठमाडौँ, ६ माघ । सडक र सदन आन्दोलन एकसाथ चलाइरहेका एकीकृत माओवादी अध्यक्ष पुष्पकमल दाहाल ‘प्रचण्ड’ माथि आक्रमणको प्रयास भएको छ ।
काठमाडौंको बिजुलीबजारमा प्रचण्डलाई लक्षित गरी ढुंगा प्रहार भएको हो । बानेश्वरबाट बबरमहल जाँदै गर्दा मंगलबार सवा ४ बजे बिजुली बजार पुल नजिकै प्रचण्डमाथि भीडबाट ढुंगा प्रहार भएको हो । संविधानसभा बैठक अवरुद्ध भएपछि प्रचण्ड जुलुसहित कोणसभामा सहभागी हुन जाँदै थिए । करिब १५ मिनेटसम्म ढुंगामुढाको शिकार बनेपनि प्रचण्ड भने जोगिएका छन् ।
सुरक्षा गार्ड प्रहरीका मनोज थापाले प्रचण्डलाई हानिएको ढुंगा आफै थापेका थिए । ढुंगा प्रहारबाट सुरक्षा गार्ड थापा घाइते भएका छन् । ढुंगा हान्नेको पहिचान भएको छैन । आक्रमण हुन सक्ने खतरा बढेपछि कोणसभालाई सम्बोधन गर्ने कार्यक्रम स्थगित गरी प्रहरीको गाडी चढेर प्रचण्ड सिँधै निजी निवास लाजिम्पाट गएका थिए ।
सोहीक्रममा बन्दकर्ताले हानेको ढुंगा लागेर प्रचण्डसँगै आएका एमाओवादी नेता जनार्दन शर्मा ‘प्रभाकर’ र सभासद् अनिता परियार लगायत केही घाइते भएका छन् । शर्माको टाउको फुटेको छ । शर्माको नर्भिक अस्पतालमा उपचार भइरहेको छ ।
प्रचण्ड फर्किएपछि कोणसभालाई नेता बाबुराम भट्टराई, कृष्णबहादुर महरा, देव गुरुङ, जितेन्द्र देव लगायतले सम्बोधन गरेका थिए ।
प्रतिक्रिया