चौतारा, २८ पुस । सिन्धुपाल्चोकको हगाम गाविसमा आयोजित दुईदिने स्वास्थ्य शिविरमा स्त्री रोगसम्बन्धी बिरामीको सङ्ख्या बढी देखिएको छ ।
गाविसमा सञ्चालित शिविरमा एक हजार १०० बिरामीको परीक्षण गर्दा सबैभन्दा बढी स्त्री रोगका बिरामीको सङ्ख्या बढी देखिएको हो ।
शिविरमा आसपासका जलवीर, सेलाङ, फुल्पिङकोट, घुम्थाङ, पाङताङसहित सात गाविसका रोगीका स्वास्थ्य परीक्षण गरी निःशुल्क औषधि पनि वितरण गरिएको थियो ।
शिविरमा विशेषगरी स्त्री रोग, दाँत तथा सामान्य चिकित्सासम्बन्धी परीक्षण गरी उपचार गरिएको थियो ।
तामाङ समुदायको बाहुल्य रहेको उक्त क्षेत्रका महिलामा अधिकांशमा पाठेघर खस्ने समस्या देखिएकाले राजधानीको अस्पतालमा जानसमेत सल्लाह दिइएको छ ।
स्थानीय सर्वदलीय संयन्त्र तथा गाविसको संयुक्त आयोजनामा शिविर सञ्चालन गरिएको गाविस सचिव ध्रुव थापाले जानकारी दिनुभयो ।
बौद्धस्थित स्तुपा सामुदायिक अस्पतालका चिकित्सक शुभेच्छा थिङको नेतृत्वमा १७ जना स्वास्थ्यकर्मीद्वारा सेवा उपलब्ध गराएको थियो ।
प्रतिक्रिया