प्रधानसेनापति क्षत्री बुधबार भारत भ्रमण जाँदै

काठमाडौँ, २२ जेठ । भारतीय सेनाका सेनाध्यक्ष विपिन राउतको औपचारिक निमन्त्रणामा प्रधानसेनापति राजेन्द्र क्षत्री ६ दिने भ्रमणमा लागि भारत जाँदैछन् ।

बुधबारदेखि शुरु हुने उनको भ्रमणका क्रममा देहरादुनस्थित भारतीय सेनाको ईण्डियन मिलिटरी एकेडेमीमा सञ्चालित अधिकृत आधार तालिमको बुधबार नै हुने आयुक्त पद प्रदान कवाजको मुख्य सक्षिकको रुपमा सहभागि हुनेछन् ।

भ्रमणको अवधिभर प्रधानसेनापति क्षत्रीको अनुपस्थितिमा बलाधिकृत रथी पूर्णचन्द्र थापाले कायम मुकायम प्रधानसेनापतिको कार्यभार सम्हाल्ने सैनिक जनसम्कर्प निर्देशनालयले जनाएको छ । क्षत्री जेठ २८ गते स्वदेश फिर्ता हुने कार्यक्रम रहेको छ ।

यस किसिमको उच्च तहको सैनिक नेतृत्वको भ्रमणले नेपाली सेना र भारतीय सेनाबीच रहँदै आएको आपसी सम्बन्ध अझ सौहार्दपूर्ण हुनुको साथै द्विपक्षीय हित र पारस्परिक सम्बन्धलाई सुमधुर एवम् प्रगाढ बनाउन थप मद्धत पुग्ने नेपाली सेनाले विश्वास लिएको छ ।