भुरुङ तातोपानीमा बाढीले दुई घर पुरिए, आधा दर्जन घरमा क्षति

म्याग्दी, ३० वैशाख । अन्नपूर्ण गाउँपालिका–२ भुरुङ तातोपानीमा आइतबार आएको भीषण वर्षापछिको बाढीले दुई घर पुरिएको छ ।

दिउँसो करीब ४ः३० बजे वर्षासँगै आएको बाढीले स्थानीय लटे गिरी र बालकृष्ण मिजारको घर पूर्णरुपमा पुरिएको घटनास्थलमा रहनुभएका वडा सदस्य वीरबहादुर पौडेलले जानकारी दिनुभयो । उहाँका अनुसार, भुरुङको ठाडो खोलाबाट आएको बाढी र तिम्लाखर्कबाट झरेको पहिरोसँगैको बाढी बस्तीतर्फ पसेपछि अन्य दुई घरमा क्षति पुर्‍याएको छ ।

स्थानीय रेखीराम पुर्जा र टेकनारायण पौडेलको घरमासमेत बाढी पसेर क्षति पुर्‍याएको छ । पौडेलको स्टेशनरी र किराना पसलमासमेत बाढीले क्षति पुर्‍याएको छ । त्यस्तै, टेकस इनलगायतका केही होटल र घरमासमेत बाढी पसेको उहाँले जानकारी दिनुभयो । बाढीबाट त्यहाँ रहेका एक दर्जनभन्दा बढी घर प्रभावित भएका छन् ।

अहिले प्रहरी र स्थानीयवासीले पहिरोबाट प्रभावित भएका घरको सामान सुरक्षित ठाउँमा लैजाने काम गरिरहेका छन् । त्यसैगरी, बाढीका कारण बेनी–जोमसोम सडकखण्डअन्तर्गत पर्ने बेगखोलामा बाढी आएपछि अहिले सवारी साधन वारपार हुन सकिरहेका छैनन् । –रासस