काठमाडौं, २३ मंसिर । ‘नाई न भन्नु ल ३’ चलचित्रबाट अभिनयमा पुनरागमन गरेकी अभिनेत्री सञ्चिता लुइटेल अहिले अभिनयमा ब्यस्त हुँदै जान थालेकी छन् ।
अर्थात उनको हातमा एकपछि अर्काे चलचित्र पर्न थालेका छन् ।
‘नाइ न भन्नु ल ३’ भर्खर सकाएकी उनी फेरि ‘आरोप’मा देखिदै छिन् ।
यो चलचित्रमा सञ्चिता पहिले झै दमदार मुख्य भूमिकामा देखिन लागेकी हुन् ।
उनीभन्दा कान्छा अभिनेता किशोर खतिवडा यसमा जोडीका रुपमा छन् ।
दिलासा क्रियशन प्रालिको व्यानरमा निर्माण हुने चलचित्र ‘आरोपको’ मुहूर्त गरिएको छ ।
सोमबार राजधानीको भद्रकाली मन्दिर परिसरमा चलचित्रको मुहूर्त गरिएको हो ।
निर्माता, वितरक प्रदीपकुमार उदयले निर्देशन गरेको मुहूर्त सटमा सञ्चिता र किशोर खतिवडाले अभिनय गरेका थिए ।
मुर्हूत सटको क्यामेरा स्वीचअन निर्माता सुनिल रावलले गरे भने निर्देशक सुमन दाहालले क्ल्याप ठोके ।
रङ् पत्रकार लक्ष्मण सुवेदीको लेखन रहेको चलचित्रलाई अमर ओलीले निर्देशन गर्न लागेका हुन् ।
दिनेश पाठक र विजय सापकोटा र निर्माता रहने यो चलचित्रमा किशोर र सञ्चिताका अलवा सुशील पोखरेल, रश्मी भट्ट, ऋचा थापा, राजन गहतराज, उद्धव गिरी, दीपिका ढकाल, भूमेश्वर भट्टराईलगायतको अभिनय समेटिने छ ।
मंगलबारबाट छायांकनमा जाने चलचित्रको नवलपरासी, चितवन र काठमाडौंका विभिन्न स्थानमा छायांकन गरिने निर्माण पक्षले जानकारी गराएको छ ।
कमेडी र एक्सनमा बन्न लागेको ‘आरोप’ निर्देशक ओलीको तेस्रो चलचित्र हो ।
अभिनयमा खारिएका निर्देशक ओलीले ‘आरोप’मा ठूलो अपेक्षा लिएको बताए ।
यस अगाडि ओलीले ‘धर्तीपुत्र’ र ‘वे टु इञ्जुरी’ नामक चलचित्र निर्देशन गरिसकेका छन् ।
चलचित्रमा वीरेन्द्र भट्टको छायांकन, सानुकुमार महर्जनको द्वन्द्व , विकास र गणेश चौधरीको संगीत रहने छ ।
प्रतिक्रिया