काठमाडौँ, २३ माघ । नेपाल एपीएफ स्कुल कीर्तिपुर काठमाडौँमा मंगलबारबाट ‘पाँचौं नेपाल एपीएफ स्कुल कप आधारभूत तह आमन्त्रित फुटबल प्रतियोगिता २०७४’ शुरु भएको छ ।
उक्त फुटबल प्रतियोगिताको मंगलबार सम्पन्न खेलमा आयोजक एपीएफ स्कुलसहित नेपाल पुलिस स्कुल र ब्राइट होराइजन चिल्ड्रेन्स होम स्कुलले विजयी सुरुवात गरेका छन् ।
उद्घाटन खेलमा एपीएफ स्कुलले ग्रिन लन्स एकेडेमीलाई २–० ले तथा ब्राइट होराइजनले एभर भिजन सेकेण्डरी स्कुललाई ३–१ गोलको अन्तरमा पराजित गरेको हो ।
यसैगरी पुलिस स्कुलले पुष्पसदन आवासीय माध्यमिक विद्यालयलाई ३–१ गोल अन्तरले पराजित गरी विजयी सुरुवात गरेको छ भने लिटल एन्जल स्कुल र ल्याबोटरी माध्यमिक विद्यालयले २–२ गोलको बराबरी खेलेका छन् ।
नेपाल एपीएफ स्कुलले आयोजना गरेको उक्त प्रतियोगितामा विभिन्न जिल्लाका विद्यालयहरु गरी कूल २० वटा टिमले सहभागिता जनाएका छन्. । उक्त प्रतियोगिता आगामी फागुन १० गतेसम्म संचालन हुने बताइएको छ ।
प्रतिक्रिया