ताप्लेजुङ, ९ पुस । सुनकोसी गाउँपालिका–६ थुम्पाखर टिमुरेका ध्रुव थापाले घरको डीपीसी सकेको एक साता बढी भयो ।
डीपीसीको नापजाँचका लागि पुनर्निर्माण प्राधिकरणबाट खटिएका प्राविधिकहरूलाई बोलाएको पनि दुई साता बढी भयो तर प्राविधिकहरूले उनको कुरा सुनेनन् ।
प्राविधिकहरू आएर डीपीसीको नाप–जाँच नगरेपछि उनले घर निर्माणको काम अघि बढाउन सकेका छैनन् । राजधानी दैनिकले समाचार छापेको छ ।
प्राविधिकहरू नआएपछि थापाले डीपीसीबाट माथिको काम अघि बढाउन नै सकेका छैनन् । ‘गाह्रो लगाउन सुरु गरेपछि आएर डीपीसी मिलेन भनेर भत्काउलान् भन्ने पीर सुरु नगरुँ बल्लबल्ल खोजेका कामदार नपाउने पीर,’ थापाले भने ।
प्राविधिकहरू डीपीसीसम्मको फोटो खिचेर ल्याउन अह्राउँछन् र फोटो हेरेरै स्वीकृति दिन्छन् । प्राविधिकले फोटो मात्र मागेपछि थापा पनि फोटोबाटै काम चलाउने निष्कर्षमा छन् ।
विनाशकारी भूकम्पपछि जिल्लाका ७५ हजारभन्दा बढी घरमा क्षतिपुग्यो । यति नै संख्यामा लाभग्राही छन् । तर किस्ता लिएर निर्माण सुरु गरेका लाभग्राहीले समेत प्राविधिकको झन्झटिलो प्रक्रिया र बेवास्ताका कारण तीन वर्षमा जम्मा ३ हजारवटा घरले निर्माण सम्पन्न प्रमाणपत्र पाएका छन् ।
प्राधिकरणले समयसीमा दिएर निजी आवास निर्माण नगरे अनुदान नदिने बताएपछि जिल्लामा पुनर्निर्माणले गति लिएको छ । तर प्राविधिकहरू गाउँमा गएर नापजाँच नगर्दा पीडितहरू समस्यामा परेका छन् ।
निजी आवास निर्माणका लागि प्राविधिक परिचालनकोे जिम्मा पाएको सहरी विकास तथा भवन डिभिजन कार्यालयका निमित्त कार्यालय प्रमुख इन्जिनियर टंक गौतम प्राविधिकहरू गाउँमै रहेको र पीडितहरूले खबर गर्नासाथ फिल्डमा पुगेको दाबी गर्छन् ।
पुनर्निर्माण प्राधिकरणले निजी आवास अनुदान २०७५ असार मसान्तभित्रै लिनुपर्ने बताएपछि गाउँ–गाउँमा निजी आवास निर्माण प्रक्रियाले गति लिए पनि गाउँमा प्राविधिक नहुँदा भूकम्पपीडितहरू समस्यामा छन् ।
जग्गा ठीक पारेर डीपीसीसम्म गरेपछि पहिलो किस्ताका लागि प्राविधिकले सिफारिस गर्नुपर्ने हुन्छ । तर प्राविधिकहरू गाउँमा नहुँदा पीडितहरू समस्यामा छन् ।
प्राविधिकहरू समयमा नै गाउँमा नजाँदा समस्या भएको त्रिपुरासुन्दरी गाउँपालिका धुस्कुनका रामबहादुर थामीले जानकारी बताए । डीपीसी सकेपछि तीन–चारपटक प्राविधिकलाई बोलाए पनि नआएको उनले गुनासो गरे ।
गाउँमा घर नापजाँच गर्न आउँदा प्राविधिकहरूले अतिरिक्त खर्च माग्ने गरेको पीडितहरूको गुनासो छ । ‘प्राविधिकहरूलाई खर्च दिए अलिकति नमिले पनि मिलाइदिन्छन्, खर्च दिएन भने खाली किचकिच मात्रै गर्छन्,’ इन्द्रावती गाउँपालिका भीमटारका कृष्णबहादुर माझीले भने ।
प्रतिक्रिया