माओवादीका मन्त्रीहरू सरकारमै बसिरहने

काठमाडौं, १९ कात्तिक । नेकपा (माओवादी केन्द्र)का मन्त्रीहरू तत्काल सरकारबाट नबाहिरिने भएका छन् ।

माओवादी केन्द्रले एमालेसँग चुनावी तालमेल गरेर वाम गठबन्धन बनाएपछि प्रधानमन्त्री शेरबहादुर देउवाले माओवादीबाट सरकारमा सहभागी सबै मन्त्रीलाई विनाविभागीय बनाएका थिए ।

माओवादी केन्द्रले कात्तिक ५ गते सरकारलाई दिएको समर्थन फिर्ता लिने र सरकारबाट आफ्ना मन्त्रीहरू बाहिरिने अन्तिम निर्णय गरे पनि निर्वाचनप्रति सरकारले षड्यन्त्र गरेको निष्कर्ष निकाल्दै सरकारमै रहने निर्णय लिएको थियो ।

तर माओवादीका अधिकांश मन्त्रीहरू निर्वाचन अभियानमा जुटेकाले निर्वाचनअघिसम्म बिनाविभागीय कै हैसियतमा भए पनि सरकारमा रहने भएका हुन् । नेपाल समाचार पत्र दैनिकले खबर छापेको छ ।