काठमाडौँ, २२ भदौ । प्रधानमन्त्री सुशील कोइरालाले दुईवटा प्रतिष्ठानका नवनियुक्त कुलपतिहरुलाई पद तथा गोपनीयताको शपथ गराउनुभएको छ ।
प्रधानमन्त्री निवास बालुवाटारमा आज बिहान आयोजित समारोहमा शपथ लिनुहुनेमा नेपाल प्रज्ञाप्रतिष्ठानका कुलपति डा. गङ्गाप्रसाद उप्रेती र सङ्गीत नाट्य प्रज्ञाप्रतिष्ठानका कुलपति भक्त श्रेष्ठ (सरुभक्त) हुनुहुन्छ ।
प्रधानमन्त्री कोइराला दुवै प्रतिष्ठानका संरक्षक हुनुहुन्छ । नवनियुक्त दुवै कुलपतिको कार्यकाल चार वर्षको हुनेछ ।
कुलपति डा. उप्रेती यसअघि सोही प्रतिष्ठानको उपकुलपति हुनुहुन्थ्यो भने सङ्गीत नाट्य प्रज्ञाप्रतिष्ठानका कुलपति सरुभक्तले पनि नेपाल प्रज्ञाप्रतिष्ठानको सदस्यको जिम्मेवारी निर्वाह गरिसक्नुभएको छ ।
समारोहमा संस्कृति, पर्यटन तथा नागरिक उड्डयन मन्त्री भीमप्रसाद आचार्य उपस्थित हुनुहुन्थ्यो । रासस
प्रतिक्रिया