मुम्बई । भारतको बैङलोरमा एक कन्नड फिल्मको सुटिङका क्रममा दुई जना कलाकारको दुर्घटनामा परेर मृत्यु भएको छ ।
‘मस्थिगुड’ नामको फिल्मका लागि हेलिकोप्टरबाट स्टन्ट गर्ने क्रममा फिल्ममा भिलेन रोल गरिरहेका दुई जना सोमबार दिउँसो थिप्पा गोन्डन हल्ली तालमा डुबेका थिए । उनीहरु अहिलेसम्म फेला परेका छैनन् । भारतीय सञ्चारमाध्यमका अनुसार प्रहरीले उनीहरुको मृत्यु भइसकेको निष्कर्ष निकालेको छ ।
भिलेनसँगै हेलिकोप्टरबाट स्टन्ट गर्ने हिरो भने पौडेर बाच्न सफल भएका छन् । यी कलाकार सो तालमाथि हेलिकोप्टरबाट स्टन्ट गरिरहेका थिए ।
समाचारमा जनाइए अनुसार राघव र अनिल नामका दुई कलाकार मस्थिगुडी फिल्मका लागि हिरो विजयसँगै हेलिकोप्टरबाट तालमा छलाङ्ग लगाएर स्टन्ट गरिरहेका थिए । हिरो विजय पौडेर ढुंगा नजिक पुगेपछि उनको उद्धार भयो । तर, राघव र अनिल पानीभित्र पसेपछि बाहिर देखिएनन् ।
घटनापछि प्रहरीले फिल्मी टिमलाई नियन्त्रणमा लिएको छ । वेपत्ता राघव र अनिलको खोजी भइरहेको छ ।
प्रतिक्रिया