काठमाडौं, १६ भदौ । नेपाली क्रिकेटका प्रशिक्षक श्रीलंकालीमूलका क्यानेडियन पुबुदु दासानायके अब नेपालमा कम्तीमा १० महिना बस्ने भएका छन् ।
उनीसँग सोमबार खेलकुद मन्त्रालयले १० महिने सम्झौता गरेपछि उनको त्यति समय नेपाल बस्ने निश्चित भएको हो ।
मन्त्रिपरिषद्को पूर्वनिर्णय अनुसार खेलकुद मन्त्रालयले औपचारिक रुपमा उक्त सम्झौता गरेपछि अब उनले मासिक १० हजार अमेरिकी डलर पारिश्रमिक पाउनेछन् ।
उनले बसोबार तथा अन्य खर्चका लागि मासिक दुई लाख रुपैयाँ अतिरिक्त खर्च पाउने छन् ।
मन्त्रालयका सहसचिव चुडामणि गौतम र प्रशिक्षक पुबुदुले उक्त सम्झौतामा हस्ताक्षर गरेका छन् ।
उनको करार अवधि सोमबारबाटै लागू भएको छ । उनले सिनियरसँगै यू–१९ राष्ट्रिय टोली समेत सम्हाल्नेछन् ।
नेपाल क्रिकेट संघ क्यानले उनको सम्झौता नवीकरणबारे कुनै औपचारिक पहल नगरेपछि उनी क्यानाडा फर्केका थिए ।
खेलाडीहरुको विरोधपछि खेलकुद मन्त्रालयले उनको पारिश्रमिक दिने घोषणा गरेको थियो । त्योसँगै उनलाई नेपाल ल्याउने प्रयास भएको थियो ।
प्रतिक्रिया