अदालतमा दोभासेको व्यवस्था

सोलुखुम्बु, २० भदौ । सेवाग्राहीको सुविधाका लागि जिल्ला अदालत सोलुखुम्बुमा पहिलोपटक दोभासे राखिएको छ । भाषाकै कारण सर्वसाधारणले सजिलै न्याय पाउनबाट वञ्चित नहोस् भन्ने उद्देश्यले दोभासे व्यवस्था गरिएको जिल्ला अदालत सोलुखुम्बुृले जनाएको छ ।

जिल्ला अदालत सोलुखुम्बुमा एक महिलासहित सातजना दोभासे राखिएको छ । विभिन्न जातजातिले बोल्ने भाषाअनुसार राखिएको जिल्ला अदालत सोलुखुम्बुले जनाएको छ ।

अदालतले राखेका दोभासेमध्ये कल्पना राईलाई अङ्ग्रेजी, कुलुङ, थुलुङ र खालिङ, आङजाङबु शेर्पालाई शेर्पा भाषाका लागि छनोट गरिएको अदालतले जनाएको छ ।

त्यस्तै नीमराज तामाङ र ल्हाक्पा तामाङलाई तामाङ भाषा तथा अशोककुमार कुलुङ र लीलानाथ राईलाई कुलुङ भाषा र जसबहादुर राईलाई बाहिङ भाषाका लागि दोभासेका रूपमा राखिएको जिल्ला अदालतका स्रेस्तेदार भगवती शर्माले जानकारी दिनुभयो ।

स्रेस्तेदार शर्माका अनुसार सूचीकृत सात दोभासेलाई अदालतका सेवाग्राहीको भाषामा कठिनाइ नहोस् भनेर सजिलोका लागि राखिएको हो ।

कर्मचारीले सेवाग्राहीको भाषा नबुझ्ने र कर्मचारीको भाषा सेवाग्राहीले पनि नबुझ्दा न्याय सम्पादनमा समस्या हुने भएकाले सहजताका लागि अदालतले दोभासे राखेको अदालतले जनाएको छ । रासस