भक्तपुर, १५ भदौ । एभरेष्ट इङ्गलिस स्कुल मिवाछें भक्तपुरले समाजसेवी महावीर पुनलाई रु तीन लाख ३३ हजार ३३३ सहयोग गरेको छ ।
विज्ञान र प्रविधिको विकास मार्फत नेपाललाई आर्थिक रुपले सम्पन्न बनाउने अभियानमा लागेका पुनले सञ्चालन गरेको राष्ट्रिय आविष्कार केन्द्रलाई स्कुलको तर्फबाट रु एक लाख ११ हजार १११, एभरेस्ट जन्मदिन कोषबाट रु एक लाख ११ हजार १११ र विद्यालयका अभिभावक, शुभचिन्तक एवम् अन्यबाट सङ्कलन गरिएको रु एक लाख ११ हजार १११ गरी रु तीन लाख ३३ हजार ३३३ पुनलाई आज हस्तान्तरण गरिएको हो ।
एभरेस्ट जन्मदिन कोषका सद्भावनादूत एवम् राष्ट्रिय गानका रचनाकार प्रदीपकुमार राई (व्याकुल माइला), विद्यालय व्यवस्थापन समितिका अध्यक्ष रामगोपाल कर्माचार्य, विद्यालयका संस्थापक प्रिन्सिपल भक्त राजभण्डारीले पुनलाई सो रकम हस्तान्तरण गर्नुभएको हो ।
म्यागासासे पुरस्कारबाट पुरस्कृत केन्द्रका संस्थापक पुनले विज्ञान प्रविधिको अनुसन्धान र विकासमार्फत नेपाललाई आर्थिक रुपमा सम्पन्न बनाउन केन्द्रले अभियान थालेको बताउँदै अबको ४० वर्षमा देशलाई सम्पन्न बनाउन सबै विद्यार्थी तथा शुभचिन्तकको सहयोगको अपेक्षा गर्नुभयो । रासस
प्रतिक्रिया